Nga Ajn
Dita e 48 e karantinës. Sot vetëm 9 raste të reja. Lajmet e koronës konkurohen fuqishëm nga lajmet e ekonomisë. Kanë nisur sherret banale, plagosjet, arrestimet. Debatet politike nuk kanë munguar për asnjë ditë. Duket sikur po i kthehemi normalitetit dhe ajo drita në fund të tunelit po ndrit më shumë. Për një javë mund të presim flokët dhe për dy javë mund të pimë kafe ekspres në filxhan dhe jo fshehurazi. Deri në orën 17:30 dhe jashtë. Pas orës 17:30 helbete kafja nuk bën mirë. Kështu pra, po nis çlirimi por ajo që kemi humbur nuk kthehet më. Më të afërmit e mi, kanë pësuar ndryshime në punët e tyre, e duam a nuk duam, puna është një pjesë e madhe e jona, jo vetëm për të ardhurat, por edhe për atë që jemi. Terapia e duhur është të mendosh se çdo e keqe e ka një të mirë, e kushedi, nëse vendimet që kemi marrë, a kanë marrë për ne, mund të na sjellin gjëra ndryshe.
Paniku i fillimit iku dhe diktati që merrnim çdo orë të ditës po zbehet. Tani nuk kemi më frikë se do vdesim nga korona, i kthehemi frikës së zakonshme se mund të vrasim njëri-tjetrin, të shahemi e të fyhemi, të ulërasim e të ankohemi. Do dalim në punë e do kthehemi të rraskapitur, pa pasur fuqi për asgjë. Dhe do pyesim sërish, se ç’mund të bënim ndryshe. Për momentin le të mbahemi, po vjen kafeja ekspres, e në ditët që kalojmë ardhja e saj më shumë se lëngun e zi, nënkupton se do e kemi vrarë frikën dhe po fitojmë lirinë. / revistawho.com
