Nga Ajn
Dita 50 e karantinës. Vetëm 6 raste të reja sot, në total 794 të prekur, prej të cilëve 531 të shëruar. Qytetarët dolën parqeve e shesheve ndërsa shifrat po ulen e frika po humb pushtetin. Kryeministri ka marrë rrugët e atdheut duke monitoruar rrugë që ndërtohen, projekte në zhvillim, e hapa madhorë drejt progresit. Nejse, nuk e kam me tërë mend gjithë ç’thashë, se mos bëhemi si ‘kronika e tv Kukësit’. Rrugët i ka marrë vërtetë, nuk flet më nga shtëpia, por nuk është se na zu prosperiteti. E vetmja që ka zënë, është pandemia dhe nuk po na lëshon. Helbete, tashi që vjen vera, do shkojë covidi se dy kunguj në një dorë nuk mbahen. Po hë për hë, me tëtë atë milet që kish dalë sot ndë parqe e ujdhesa, ndë lëndina e ndë rrugë, ndë oborre pallatesh e lagjesh të varfra, zor e ka të vejë. Që kurse u paketuam në pallate me shtëpi 1+1, oborret e pallateve u bënë më të nevojshme. Por edhe ato i kthyem në sheshe ndërtimi dhe rrimë ngjit e ngjit si në protestë. Sot pashë pamjet e një mrekullie; i kini parasysh ato autobusët të mbushur tejendanë nga njerëzit, ku nuk hidhet kokrra e grurit, ca më këmbë e ca ulur? I kini. Ja, një prej tyre e bëmë të fluturojë. Domethënë një avion që erdhi nga Gjermania me shqiptarë ‘të riatdhesuar’ e kishin mbushur vetëm në mall të kohëve kur gjezdisnim me autobus poshtë e përpjetë nëpër Tiranë. Eh, çbën malli. Të than sytë(dhe fytin).
