Nga Ajn
Dita e 23 e izolimit. 361 të infektuar, mosha mesatare e rasteve 50 vjeç e 104 të shëruar. Sot është e trishtë të shkruash për 21 jetët e humbura, mes të cilëve së fundmi një ish-boksier e dy të moshuara. Në një vend ku meshat e së dielës mbahen pa besimtarë, qyteti që nuk ndjen hapa këmbësorësh, fotografon tanke në rrugët kryesore të tij. Kilometra larg xhiros së automjeteve të armatosura, në kufijtë shqiptaro-grekë prej ditësh, në atë që njihet si tokë e askujt, më se 60 qytetarë shqiptarë kalojnë ditët e netët të bllokuar mes të ftohtit pa u lejuar të hyjnë në vend. Njësoj si sirianët para portës sime, shqiptarët e mbetur në kufi janë qytetarë pa atdhe. Atdheu u ka mbyllur dyert për shkak të rrezikut të mundshëm të infektimit me ‘Covid-19’. Për hir të mbrojtjes së jetëve, po sakrifikojmë jetë të tjera dhe le të mendojmë tashmë se cilat jetë vlejnë më shumë. Nuk mund ta dimë në të vërtetë. Tashmë i kemi ribërë kontratat shoqërore e familjare duke i lënë prindërit të mbyllur larg nesh për hir të jetës. Kemi humbur punët për hir të jetës, nuk kemi më miq për hir të jetës dhe në këtë kontratë të re ku jemi të gjithë larg të gjithëve, të lënit në tokë asnjanëse të atyre që lufta i zuri jashtë, është veçse një ndodhi më shumë- një statistikë me tepër. Tanimë kemi frikë nga të gjithë gjithnjë. E shohim njëri-tjetrin si sëmundje të mundshme. Shteti të cilit i përkasim na ka kërkuar të mos dalim, të mos ikim e nëse kemi ikur të mos kthehemi, edhe me kushtin që nuk kemi ku të rrimë. Pra jetët e kujt vlejnë më shumë dhe kush e vendos? Qytetarët të paatdhe kanë mbetur rrugëve, me pak fat kanë gjetur strehë te të afërm të largët. Të pafatët do kthehen shpejt në lypës, prej se janë qytetarë paatdhe. Kemi humbur 21 jetë dhe po lëmë në kufi së paku 60. Në tokën asnjanëse. Mes dy shteteve. Ne nuk na lejohet të dalim. Atyre të hyjnë. Ne e kemi atdheun burg. Ata e kanë shtëpi. Ne jemi lodhur prej mbylljes, ata prej pritjes. Të dy palëve na rrezikohet jeta, ne kur shkojmë për të bërë pazar e atyre nga uria e të ftohtët. Atdheu është lakuriq./revistawho.com
