Nga Ajn
Dita e 26-të e izolimit. Nuk do i mbaja mend sa janë të mos ishte për këtë ditar karantine. E kam humbur sensin e kohës. Brenda mureve nuk ndodh asgjë e re. Jashtë po. Atje është jeta dhe lufta dhe ëndrra dhe e ardhmja dhe gëzimi dhe miqtë dhe puna dhe ata që dua dhe ato që dua të arrij dhe ato që mbase nuk arrij, por që prapë do përpiqem duke u rrëzuar e duke u ngritur. Të gjitha janë jashtë si të ardhme të mundshme, por unë jam brenda dhe ndjej se po të shtrij dorën dhe mund t’i prek. Brenda me mua është vetëm shpresa dhe disa libra të mirë që për momentin më çojnë në çdo vend të botës duke më dhuruar historitë e udhëtimet e të tjerëve. Unë jam këtu, me shpresën dhe me disa shifra, 154 të shëruar, 400 të infektuar e 17 vetëm sot. Dhe ndërsa ne ankohemi për atë që nuk mundemi të bëjmë, një gazetar i ‘CNN’, Chris Cuomo, vëllai i Andrew Cuomos, guvernatori i New York që është prekur nga ‘Covid-19’ ka dalë me një video ku ka treguar jo vetëm si po e përjeton sëmundjen, por edhe si mund të mundet ajo. Ai kërkon që secili që është i sëmurë ta gjejë forcën brenda vetes, duke luftuar jo vetëm shpirtërisht, por edhe fizikisht.
Dhe ata që sot luftojnë me sëmundjen, të mbyllur më keq se ne, të shtrirë në spitale e krejt të pafuqishëm për të lëvizur, krejt të pamundur për të takuar të afërmit, herë-herë edhe pa folur me ta, do të duhej ta gjenin forcën te vetja. Ne jemi të vërtetë vetëm kur jemi vetëm dhe prapë nuk jemi vetëm sepse përreth nesh ka njerëz si ne që jetojnë njësoj, ndjejnë njësoj. Nëse nuk duam të mendojmë për ata që vuajnë teksa ne mërzitemi, le të mendojmë se mund të vuajmë edhe ne si ata. Chris Cuomo këshillon që secili që është i sëmurë duhet të sforcojë veten të ecë në këmbë nëpër dhomë, të çohet nga krevati, të ushqehet, të pijë lëngje dhe të bëjë gjithë ato që trupi po i refuzon. Sepse janë mushkëritë të sëmura, ndërsa mendja, duhet t’i imponohet. Që t’ia dalësh, duhet të luftosh, e ky është një rregull i vjetër sa vetë bota./revistawho.com
