Nga Ajn
Dita e 25 e izolimit. 383 të infektuar në Shqipëri. Tani infektimet po zgjerohen brenda familjeve, thonë specialistët. Më në fund emigrantët e mbetur në Kapshticë lejohen të hyjnë në Shqipëri meqë shqiptarët e Diasporës kanë marrë përsipër të paguajnë karantinimin e tyre 14-ditor në një hotel në Korçë. Edhe 100 vjet më pas jemi ende te “Mbahu nëno mos ki frikë se ke djemtë në Amerikë”. Megjithëse edhe Amerika duket më e bukur, më e madhe, më e fortë në filma se ç’është në të vërtetë. Kam disa ditë që ëndërroj të zgjohem në mëngjes dhe të kuptoj se kjo është ëndërr. Por ja që zgjohem në mëngjes dhe kuptoj se mund të fle prapë se nuk kam se ku të shkoj. Maksimumi mund të shkoj në kuzhinë, të bëj një kafe e të dal në ballkon. Çka nuk është keq nëse marrim parasysh se kam ndërruar me këtë veprim 3 ambjente. Këto veprime i shtyj për më vonë se tek e fundit i kam të 24 orët në dispozicion prej 24 ditësh. Megjithë rehatin që më ka zënë pa pasur nevojë të vras mendjen për vrapimet e jetës së përditshme, unë tani do doja të isha në një film amerikan. Në filmat amerikan ka gjithmonë zgjidhje në fund. Rastësisht sot pashë filmin e 1995-ës “Outbreak” dhe arsyeja pse e pashë ishte fiks për të kuptuar si do zgjidhej situata. Që atëherë dihej se viruset shpërndashin nga ajri, prekja dhe ambjentet e përbashkëta. Masa ushtarake, izolim dhe burgje si në ditët tona edhe në film. Po ja që aty virusi ishte shpërndarë nga ushtria amerikane dhe atyre iu desh vetëm 1 orë e 30 minuta sa zgjat filmi për ta gjetur. Megjithatë po të ishim në një film amerikan do e kishim gjetur vaksinën dhe vetë ilaçet magjibërëse. Ja pse Amerika është më e bukur në filma. ‘Hollywood’ është më i shpejtë se shteti. Nuk e kuptoj pse këta skenaristët e ‘Hollywood’ nuk i japin një dorë Trumpit?/revistawho.com
