Nga Ajn
Dita e 40 e karantinës. 663 të infektuar, vetëm sot 29 raste, 13 në burg. Parlamenti miratoi kodin e ri penal, tani jemi zyrtarisht në një sistem të ri politik, së paku për aq sa zgjat pandemia. Nëse duke thyer rregullat, infektojmë dikë që më pas vdes, do kalojmë në një izolim pas hekurave. Shqipëria, e jo vetëm, ka hequr dorë nga liritë për hir të jetës, thonë. Nuk e dimë më pas sa jetë është të mos pasurit liri. Dhe ç’jetë është të jetosh me frikën se liria është vdekje.
Sot jam një dyqan këpucësh, por asnjë këmbë nuk e shkel pragun tim. Nuk ka duar që hapin dyer dhe asnjë këpucë e imja nuk e kalon pragun. Sot jam një dyqan këpucësh, por jashtë derës sime, nuk ndjej hapa. Trotuari është bosh dhe matanë rrugës shoh klientët e mi të mbyllur brenda dyerve të shtëpive të tyre si këpucët e mia në magazinë. Numërojnë qindarkat për bukën dhe s’ka mijëra për mua. Këpucët e mia të pambathura nuk i provon askush, asnjë këmbë s’u qaset e asnjë dorë s’i prek. Më kanë lënë të hapem, por nuk i lënë klientët e mi të vijnë. Liria ime nuk është liria e tyre, e për aq kohë sa ata janë mbyllur ç’vlerë ka hapja ime. Liria ime merr kuptim me lirinë e tyre, përndryshe as unë as ata nuk janë të lirë.
Sot jam një dyqan këpucësh, por ndjej vetëm erën e lëkurës, nuk ndjej erën e jetës, erën e njeriut, erën e frymëmarrjeve dhe trupave njerëzorë. Kam të njëjtat këpucë në vitrinë prej dy muajsh, e tani që ju hoqën pluhrat janë bërë më të bukura. Por edhe ato bartin dhembjen e trishtimin e atyre që i kanë qepur duke punuar si të marrë në ngrehina të mëdha që prapë kanë pak vend. Sot jam një dyqan këpucësh e ata pak njerëz që kalojnë para meje i kanë këpucët si të Lulit të vocërr. Shtrëngojnë fort në duar ndonjë qese të vogël me fruta dhe shpijnë këmbët e tyre të lodhura. Sot jam dyqan në një botë që as nuk blen, as nuk shet, as nuk merr, as nuk jep, as ka aromë, e as shije. Bota e frikës është si ngjyra e këpucëve të mia, e errët. Siguri për të nesërmen japin më shumë këpucët e mia se bota jashtë. Dhe ja ku jemi pjesë e së tërës, këpucë që nuk mbathen e këmbë që nuk ikin./revistawho.com
