Nga Ajn
Dita e 36 e karantinës për mua. Për të tjerë ka kaluar dita e 40. 14 të infektuar të rinj janë konfirmuar sot, në total 562. Pas 6 javësh mbylljeje dje nëpër Shqipëria u lejuan të dalin të moshuarit. Lejen u dha shefi i qeverisë me një status në ‘Faccebook’. Po ai, dokumentoi me një sërë fotosh parqe e rrugë ku të moshuarit ecnin a merrnin rreze. Sot lejen për të dalë e patën nënat me fëmijë deri 10 vjeç. Leja ju dha dje sërish me një postim në ‘Facebook’, ndërsa xhiroja e tyre në sheshe e parqe u ndoq nga fotografë profesionistë që sollën portrete fëminore e nëna të qeshura. Ç’imazhe fantastike të një eksperimenti të madh, aparati dhe droni na ndjek kur jemi të izoluar, na ndjek edhe kur na jepet leja për të dalë. Jemi të përndjekur kudo, e dokumentohemi në lëvizjet tona. Imazhet tona postohen për të treguar se sa të lumtur jemi. Gjobat e vëna deri sot janë falur, sepse parimisht ishte të paligjshme, gjobat nuk mund të vihen bazuar në postime kryeministrore as ministrore. Por nga nesër, hyjmë në një fazë të re. Ndryshimi i kodit penal të enjten në kuvend bën që gjobat të jenë të ligjshme dhe rreziku për ata që thyejnë izolimin a karantinën është i ashpër. Sepse rrezikon jetë. Një sërë nenesh kushtetuese janë pezulluar, liritë e të drejtat janë kufizuar dhe shteti ynë tashmë i ngjan më shumë atij pararendës komunist, ndonëse këtë herë bëhet fjalë për të shmangur infektimet nga ‘COVID-19’. Nesër është një ditë e re. Hapen disa biznese, duke bërë të lirohen masat. Kujdesi tashmë duhet të jetë i jashtëzakonshëm, për vete, për tjetrin, për atë si ne. Sepse këtë herë tjetri jemi ne dhe nëse nuk jemi mirë të gjithë nuk është mirë asnjë. Zezoma që endet nëpër botë si edhe te ne, nuk është më e huaj. Ajo mund të jetë kudo. Dhe nëse fqinji ynë është keq, jemi dhe ne. Nesër është një ditë e re, një javë e re. Java e 7-të e Covidit mes nesh, java e shtatë e frikës, panikut, trembjes. Nesër është një tjetër e hënë mbyllur, pa shkolla e takime. Tashmë me një kod të ri dënimi, kriminel je edhe nëse përhap një sëmundje krejt pa dashje. Jemi në të ardhmen, vrasje pa paramendim, padashje, padijeni. Vrasje me frymëmarrje. Merrni frymë thellë, nxirreni mbi maskën tuaj dhe heshtni. Fjala dhe frymëmarrja në drejtim të gabuar mund të vrasin./revistawho.com
