Variçet (venat varikoze) janë një shqetësim estetik, por në disa raste shoqërohen me dhimbje të forta.
Çfarë i shkakton varicet?
Faktorët që shkaktojnë venat varikoze lidhen me qëndrimin e gjatë në këmbë (rritet presioni në venat e këmbëve, mungesa e aktivitetit fizik, mbajtja e këmbëve të kryqëzuara kur rrini ulur, si dhe kequshqyerja për një periudhë të gjatë kohore.
Këto nuk janë shkaqet e vetme. Variçet janë të trashëgueshme. Në qoftë se prindërit apo gjyshërit tuaj kanë vuajtur prej tyre, me shumë mundësi do të trashëgohen.
Sipas specialistëve dhe të dhënave mjekësore, variçet shfaqen më tepër te femrat sesa te meshkujt. Kjo pasi hormonet femërore dhe estrogjeni e lëshojnë më shumë indin lidhor. Kështu, kur femra përdor metoda kontraceptive apo është shtatzënë (nivel i lartë estrogjenit në organizëm) është më e rrezikuar ti shfaqen variçe.
A parandalohet shfaqja e variçeve?
Variçet nuk shfaqen sa hap e mbyll sytë, por për muaj dhe vite. Me një regjim të mirë ushqimor dhe me aktivitet fizik të vazhdueshëm, ato mund të parandalohen.
Specialistët këshillojnë sporte të tilla, si: ecja e lirë, vrapi, biçikleta, kërcimi dhe noti, gjatë të cilave vihet në punë pompa e muskujve të kërcirit. Mos përdorni takat e larta dhe mos e mbani këmbën e ngjeshur në këpucë.
Sportet që nuk rekomandohen në qoftë se kanë filluar të shfaqen variçet, janë: futbolli dhe tenisi, pasi presioni në vena është i menjëhershëm.
Specialistët gjithashtu këshillojnë kryerjen e veprimeve që i tkurrin venat, siç është masazhimi i këmbëve me ujë të ftohtë. Shmangni banjat me ujë të nxehtë dhe qëndrimin e gjatë në diell, pasi ndikojnë në zgjerimin e venave.
Si ndikon ushqimi në parandalimin e variçeve?
Alkooli dhe pijet e pasura me natrium bëjnë që të mbahet ujë në trup dhe të rritet vëllimi i gjakut. Tregohuni të kujdesshëm konsumoni sa më shumë ushqime me fibra dhe sa më pak kripë.
