Në një kthesë që tejkalon kufijtë e një historie showbiz-i dhe prek drejtpërdrejt çështje ligjore dhe etike, rasti i artistit Gjesti po merr një dimension të ri publik. Pas arrestimit për disa vepra penale dhe përfshirjes së emrit të tij në një konflikt me kompaninë muzikore “Onima”, vëmendja është zhvendosur nga ngjarja në prapaskenë, te marrëdhënia kontraktuale dhe mënyra se si ajo është menaxhuar.
Avokati i artistit ka hedhur dritë mbi një element kyç, duke deklaruar fjalë për fjalë: “Kontrata e distribucionit që ka nënshkruar Gjesti me Onima-n është e qershorit të vitit 2023, dhe ka pasur kohëzgjatje për dy vjet, që ka nënkuptuar deri në qershor të vitit 2025. Kontrata ka mundur të mos vazhdohet në mënyrë automatike nëse është dhënë një njoftim 90 ditë përpara”. Një detaj që, në pamje të parë teknik, por që në thelb hap diskutimin për lirinë kontraktuale dhe kufijtë e saj.
Më tej, narrativa bëhet edhe më e ndërlikuar, kur avokati shton: “Kur kthehemi prapa, në atë kohë Gjesti ka qenë në Big Brother, dhe në Big brother ka qenë na pamundësi që ta japë njoftimin 90 ditë para. Por Gjesti, para se të hynte në Big Brother, ka njoftuar zyrtarisht Onima-n që nuk dëshiron që të vazhdojë me të. Si Gjesti, ashtu edhe prindi i Gjestit. Kontrata është vazhduar kundër vullnetit të Gjestit”. Një deklaratë që e zhvendos çështjen nga një konflikt i zakonshëm biznesi në një debat mbi të drejtat dhe pëlqimin real në marrëdhënie kontraktuale.
Ndërkohë, konteksti personal i artistit e bën historinë edhe më të ndjeshme. Lirimi nga paraburgimi më 19 mars, në ditëlindjen e vëllait të tij të ndjerë, i jep kësaj ngjarjeje një dimension emocional që nuk mund të anashkalohet. Në një kohë kur publiku është i ndarë mes perceptimit të figurës publike dhe realitetit juridik, kjo histori ka gjithë vëmendjen e ndjekësve deri në zbardhjen e të vërtetës.
