Besimtarët myslimanë shqiptarë, ashtu si në mbarë botën, kanë falur Namazin e Fitër Bajramit në “Sheshin Skënderbej” në Tiranë, nën drejtimin e Kryetarit të Komunitetit Mysliman të Shqipërisë (KMSH), Bujar Spahiu.
Në këtë ditë të rëndësishme, Spahiu përcolli një mesazh të fuqishëm për familjen, duke theksuar sfidat me të cilat përballet shoqëria sot.
“Ne jetojmë në një epokë ku vlerat e familjes po lëkunden, ku njeriu matet me atë çfarë ka dhe jo atë çfarë është. Zoti na thotë që: Më i miri prej jush është ai që është më i dobishëm për njerëzit. Ndaj sot kemi nevojë për njerëz me karakter, që nuk tuten nga frika por qëndrojnë drejt ndaj së vërtetës,” u shpreh Spahiu.
Ai theksoi se kjo festë nuk është vetëm një moment gëzimi, por edhe një mesazh për unitetin dhe solidaritetin mes njerëzve.
“Kjo ditë s’është vetëm festë, por edhe mesazh. Ne jemi një komb, dhe një familje nuk e braktis njëri-tjetrin. Sadakaja është një rikujtim ku pasuria nuk është në dorën e një njeriu, por të gjithkujt. Zoti na mëson se pasuria nuk është në atë çfarë mbledhim, por atë çfarë shpërndajmë,” shtoi ai.
Ndërkohë, pas faljes së Namazit, Spahiu uroi të gjithë besimtarët për festën dhe bëri thirrje për më shumë tolerancë dhe drejtësi.
“Besimtarët myslimanë kremtojnë sot Fitër Bajramin pas 30 ditësh agjërimi në muajin e shenjtë të Ramazanit. Kjo është një ditë e veçantë për shpërndarjen e lëmoshës dhe për t’u solidarizuar me të varfrit, në mënyrë që të gjithë ta ndajnë së bashku gëzimin e kësaj feste,” përfundoi ai.
