“Made in Albania”, drama e Altin Bashës bashkon Zyliha Milotin e Luftar Pajën
“Made in Albania”, është drama më e re e Stefan Çapalikut dhe pjesa e tretë e “Triologia Albanica”, ku bëjnë pjesë edhe monodrama “I’m from Albania dhe drama “Allegretto Albania”. “Made in Albania” i bën jehonë Shqipërisë së sotme, asaj të vërtetës, thelbësores, të “padukshmes”. Ngjarjet zhvillohen në një rrobaqepësi, biznes fasonësh, në të cilën punojnë gra të të gjitha moshave dhe që prodhojnë rroba me etiketat “Made in Albania”. Regjisor i produksionit do të jetë Altin Basha, në bashkëpunim me të cilin autori ka pasur një sukses ndërkombëtar në Festivalin “Drama të Reja nga Europa” në vitin 2010 në Gjermani, ku fituan çmimin e parë me “Allegretto Albania”. Kjo shfaqje do jetë produksion i mbështetur nga “Bashkia e Tiranës” dhe “Teatri Kombëtar Eksperimental”. Skenografe dhe kostumografe do jetë Iliriana Loxha, koreograf Gjergj Prevazi dhe kompozitor Endri Sina. Në rolet kryesore do të interpretojnë Zyliha Miloti, Luftar Paja si dhe 11 aktorë të tjerë më të rinj. Mendohet që premiera të jetë në javën e parë të muajit Prill.
“Të çmendurit Adams”, komedi muzikore tek “Teatri Eksperimental”
“Të çmendurit Adams” është një komedi e re muzikore që ka për qëllim edukimin përmes argëtimit të publikut nga 14 vjeç e sipër. Ajo vihet në skenë në datat 5-19 mars. Përmes lojës profesioniste të aktorëve, kërcimeve apo këngës totalisht ‘live’, sigurohet argëtimi i publikut familjar për plot 80 min. Një shfaqje ku preken mjaft tema universale, ndër të cilat më kryesorja është ajo e vlerave të familjes. Ku gjenden ato? Një familje në aparencë e “çuditshme” përballë familjes tradicionale. Një histori fantastike dashurie mes dy adoleshentëve dhe një makth për çdo baba. Wdnesday Adams, dikur një vogëlushe e mbushur me ligësi të hijshme e të papërmbajtshme, që do të helmonte vëllain e vet vetëm për një xhiro me ambulance, tashmë është rritur dhe ka gjetur dashurinë. Fatkeqi Lukasi, një djalë i ëmbël e romantik nga një familje e zakonshme, të cilin familja Adams nuk e ka njohur asnjëherë. Dhe sikur të mos mjaftonte, Wdnesday i rrëfen dashurinë të atit dhe i përgjërohet të mos i tregoj të ëmës. Tashmë Gomez Adams, duhet të bëjë atë që nuk e ka bërë kurrë më pare, të mbajë një sekret nga gruaja e tij që e adhuron aq shumë saqë puth edhe tokën ku ajo shkel, Morticias. Gjithçka do të ndryshojë për familjen Adams brenda një nate kaotike kur Lukas dhe prindërit e tij “normalë” ftohen për darkë nga të “çmendurit” Adams. Premtohet argëtim ferri me drita të ndezura në sallë. Endri Çela-Regjisor/Përkthyes; Erjon Medha-Drejtues muzike; Aledia Kondaj-Koreografe; Sofi Kara-Kostumografe dhe Beqo Nanaj-Skenograf. Shfaqja vjen me aktorët: Elidon Alika, Adriana Tolka, Ina Morinaj, Ilia Kaçi, Kristian Koroveshi, Dajana Nenaj, Andi Begolli, Donald Shehu, Vlera Pylla, Anderson Gurra, Ermir Jonka, Oriada Zeza, Françeska Hysi dhe Aldjon Matarangasi.
Johan Padan dhe Amerikat, katër ditë në teatër
“Johan Padan dhe Amerikat” do të risjellë në skenë aktorin Arben Berhemi i cili me tekstin e Dario Fo dhe regji të Milto Kutalit do të tregojë historinë e njerëzimit parë nga sytë e një mashtruesi, nga dita e enjte deri të dielën (datat 25, 26, 27 dhe 28 shkurt), në ora 19:00 në “Teatrin Eksperimental”. Ajo është një ndër veprat më të bukura të nobelistit dhe dramaturgut të famshëm, e cila shpalos në këtë komedi, 12 karaktere në 6 dialekte për 1 orë e gjysëm, e flet gjihashtu për historinë e njerëzimit e parë nga sytë e një mashtruesi. Kjo vepër vjen në shqip në tetë dialekte të ndryshme. Ashtu si Dario Fo e shkruajti në dialekte të ndryshme të gjuhës italiane, edhe regjisori Kutali ka ndjekur të njëjtën skemë për ta sjellë në shqip.
