Kur një fëmijë pyet se si ka ardhur në jetë, shumë prindër dhe mësues e gjejnë veten të pavendosur për t’iu përgjigjur. Lira Gjika thekson rëndësinë e trajtimit të këtij misteri me ndershmëri dhe qartësi, duke shmangur heshtjen apo shmangien e temës.
“Është shumë e çuditshme se si fantazia prodhon sharje dhe etiketime pa fund për aktin e ngjizjes dhe kur vjen puna tu tregojmë fëmijëve se si vijmë në jetë heshtim, madje i themi fëmijës ‘turp nuk pyetet për këto gjëra.’ Me dashje padashje, e lemë fëmijën në duart e ‘rrugës’.”
Gjika thekson se ky lloj qasjeje i lë fëmijët të zbulojnë informacionin nga burime të pasigurta dhe shpesh të pasakta.
“Ende në shkolla nuk tregohet bukur akti seksual si akti i rigjenerimit dhe ngjizjes së jetës. Flitet me nënkuptime sikur të jetë turpi më i madh edhe pse kemi ardhur të gjithë pa përjashtim nga akti seksual.”
Gjika u bën thirrje prindërve dhe mësuesve të jenë të hapur dhe të ndihmojnë fëmijët të kuptojnë këtë aspekt të jetës në mënyrë të natyrshme dhe të shpjeguar me kujdes.
“Prindër, mësues, tregojani bukur të vërtetën e jetës.”
Ajo e përshkruan konceptin e ngjizjes si një mister të mrekullueshëm që nuk duhet banalizuar.
“Sesi nëpërmjet tjetrit dhe aktit seksual ne çlirojmë energjinë e jetës dhe realizohet ngjizja e saj, japim dhe marrim apo dhurojmë dhe na dhurohet vetja që të arrijmë te ky mister. Misteri se si bashkohen dy mikroorganizmat fillestarë dhe shkrihen në një jetë të re.”
Sipas saj, është paradoksale sesi në rrugë dhe në media përdoren shprehje dhe përmbajtje vulgare për aktin seksual, ndërkohë që thelbi i tij si një proces natyror dhe i rëndësishëm nuk shpjegohet siç duhet.
“Në rrugë dëgjon gjithfarë banalitetesh për zonën seksuale dhe aktin e ngjizjes sa gati po ia shuajnë atë çfarë përfaqësojnë.”
Në përfundim, Lira Gjika nxit të rriturit të largohen nga turpi dhe të trajtojnë edukimin seksual me ndershmëri, duke u dhënë fëmijëve njohuritë e duhura nga burime të sigurta dhe të besueshme!
