Kur pasarelën e bëjnë mamatë modele…

Ka dhe një arsye shumë të fortë se përse sfilata e “Geraldina Sposa”-s ngjall kaq shumë interes, përtej kureshtjes që të ndiqen tendencat më të fundit të veshjeve të nusërisë: për të mësuar se kush do të sfilojë. Prej katërmbëdhjetë vjetësh tashmë që organizohet çdo fillim qershor (ndërkohë që salloni këtë vit feston ditëlindjen e njëzetëedytë), kjo sfilatë ka veçantinë që ka veshur me fustan të bardhë shumë vajza të njohura të ekranit. Tashmë disa prej tyre, edhe pse në fillim të karrierës kanë qenë adoleshente, janë bërë nëna, por kjo nuk do i mbajë aspak larg pasarelës së “Geraldinës”. Adrola Dushi është njëra prej tyre, por edhe Suada Sherifi dhe Matilda Mecini. Kurse Linda Poda, e cila kthehet sërish në pasarelë, ruan ende kujtimet kur parakalimin me fustanin e nusërisë e bëri me vajzën e saj tetë muajshe në bark, dy vite të shkuara… Këtë përvojë këtë vit do ta kenë dy vajza të tjera, që nuk do e fshehin barkun e rrumbullakosur nën fustanin nusëror, dy kliente që në të shkuarën kanë qenë nuse të “Geraldinës” dhe që tashmë bashkë me shumë të tjera, kanë fatin që në një natë të shndërrohen edhe në modele. Nga “Geraldina” premtojnë surpriza të tjera mes këtyre emrave. Do i zbulojmë të enjten./ revistawho.com