Ç’bën kur të merr malli? Lexon bisedat e vjetra apo shkruan disa vargje? Në fakt këngëtarja e njohur Era Rusi me vargjet e mallit ka sjellë një superkëngë. E rikthyer pas disa vitesh mungesë, “Kur të merr malli”, duket se ka goditur në shenjë në mënyrën më të veçantë. Fansat e kanë adhuruar këngën me dëgjimin e parë dhe Era do të na shoqërojë gjatë bashkë me mallin, verën, diellin dhe detin. Në një intervistë së fundmi për “Pardon my french” në “TAR”, ajo ka zbuluar edhe disa detaje pikante nga jeta dhe karriera e saj.
Kujt i dedikohet kënga?
“Në fakt malli është shumë dimensional dhe varet nga përjetimi. Por konkretisht tani është malli i dashurisë”.
Pse rikthim me baladë?
“Në fakt e kam menduar gjithmonë që skenat e festivaleve kanë një tjetër madhështi le të themi dhe duan këngë më të mirëmenduara artistikisht kurse kësaj here vendosa bashkë me ekipin dhe kompozitorin e këngës Edi Balilin që dua ta falenderoj sepse është një perlë kjo balada. Nuk doja ta lija më në sirtar, doja ta ndaja me publikun. Ka kohë që është si demo. Në fakt ne kemi gati që në dhjetor-janar që e mendojmë si projekt. Bëmë demon dhe varianti i parë më ka pëlqyer shumë ashtu dhe doja direkt ta ndaja si gjë por Edi kishte mendimin tjetër që të sillte në një formë më madhështore dhe kisha besim tek ai dhe u bë”.
A ka menduar të bëjë një koncert-recital?
“E kam menduar, më shkoi mendja thashë pse jo. Është një shpenzim shumë i madh që për momentin nuk e di sa mund të përballohet e para dhe e dyta mendoj që nëse do të bëja një ditë një recital do të bëja diçka të çmendur. Do të vijë ajo ditë por mendoj që është një tjetër fazë. Kemi disa gjëra të reja për të bërë deri atëherë”.
A do të ndryshonte Era Rusi për një person nëse do ta donte shumë?
“Unë mendoj që me vetëdije apo pa vetëdije të gjithë ndryshojmë nga pak ose përshtatemi. Disa kompromise duhet t’i bësh”.
Na mbetet vetëm të presim surprizën e radhës nga Era.
Deri atëherë të shijojmë këngën, se na mori malli.
