Ky do të jetë formacioni i Shqipërisë në ndeshjen e sotme

Gianni De Biasi , trajneri i kombëtares shqiptare, ka menduar që ndaj Maqedonis do luajë me sistemin 4-4-2. Kombëtarja shqiptare i ka mbyllur mbrëmë përgatitjet për ndeshjen me Maqedoninë me seancën e fundit stërvitore në stadiumin “Loro Boriçi” të qytetit të Shkodrës. Në stërvitjen e fundit, trajneri zhvilloi një ndeshje brenda grupit. Por, tashmë është e qartë se ai ka zgjedhur që katërshja e mbrojtjes para portës së Berishës do të jetë e përbërë nga Hysaj, Gjimshiti, Mavraj dhe Agolli. Sa i përket mesfushës, Kukeli, i cili luan zakonisht para mbrojtjes, do të ulet në stolin e rezervave. Kurse, titullar do të jetë padyshim Abrashi, ndërsa partner në qendër do të ketë Memushajn ose Kaçen. Hyka duket se ka fituar balotazhin në krahun e majtë me Lenjanin, ndërsa parashikohet që Xhaka të eksperimentohet si mesfushor i djathtë në këtë duel, shkruan Panorama Sport. Për dyshen e sulmit, të gjitha sinjalet të çojnë drejt asaj Sadiku-Çikalleshi, me Balajn që pritet të nisë takimin nga stoli i rezervave, i gatshëm për t’u hedhur në fushën e lojës nëse do të jetë e nevojshme. De Biazi nuk ua ka komunikuar lojtarëve formacionin titullar, pasi do ta bëjë një gjë të tillë gjatë mbledhjes së sotme me ekipin. Gjithsesi mbetet për tu parë nëse do të ketë ndryshime të momenteve të fundit.