Ajo e ka pasur gjithmonë vëmendjen me vete, edhe gjatë periudhës që vendosi të bëjë pushim për shkak të mëmësisë… Sepse kështu është gatuar Çiljeta, e ndoshta kështu jemi gatuar edhe ne, që nuk rrimë dot pa marrë vesh çfarë bën ajo. E ka tashmë vetinë të na bëjë kuriozë për çdo gjë. Mjafton një status, a foto dhe të gjitha mediat shkruajnë për të. Siç kanë shkruar gjatë javëve të fundit për gjoksin e ri, për flokët brunë, për telat në dhëmbë, apo për një histori të mundshme dashurie me portierin e “Partizanit”, Alban Hoxhën. Asnjëri nga të dy nuk ka bërë asnjë deklaratë për këtë deri tani, por nëse zërat do të pohohen nga çifti, do të ishte shumë mirë sepse do të bënin një nga kopjet më të bukura të showbiz-it. Po le ta heqim për një moment vëmendjen nga look-u dhe jeta private e të flasim për Çiljetën këngëtare.
Prej një viti i është kthyer skenës. Plot katër klipe, të gjithë shumë të komentuar. I pari në bashkëpunim me Noizy-n. “Gangsta Love” ishte një minifilm, klipi i parë i këtij lloji në Shqipëri. Klipi i dytë ishte ai në bashkëpunim me Lil Kolin dhe Fifin – “Big Booty”, i cili u pasua nga tjetër klip e këngë shumë e pëlqyer siç ishte “Aventura” në bashkëpunim me Armend Ademin. Me të katërtin, të publikuar mbrëmë në darkë kthehet edhe një herë brenda familjes “OTR”, duke shënuar bashkëpunimin e dytë me atë që Çili e quan vëlla, liderin e këtij labeli Noizy-n. “Më shumë se dollar”, është komentuar nga të gjithë si hiti i kësaj vere. Për ata që nuk e dinë, kënga u bë hit që me publikimin pirat të variantit demo, i cili u shpërnda me shpejtësi marramendëse në çdo i-phone. Por Çili nuk do të ndalet me kaq. Vetëm pas një jave pritet që të publikojë një tjetër klip në bashkëpunim me Altin Sulkun dhe pas tij ka edhe një projekt solo.
E ka ndarë mendjen që ky do të jetë viti i saj dhe e ka gjithçka në favor të vetes, përfshirë këtu edhe horoskopin. Siç e shohim në klipin e fundit (të xhiruar përpara se të bënte operacion gjoksin) Çiljeta tashmë 31 vjeçe është në super formë, e gatshme për të konkurruar çdo këngëtare të gjeneratës së re me dukjen dhe fizikun, që e bëjnë edhe sot një ikonë të bukurisë. Këngët e publikuara përgjatë këtij viti janë të gjitha hite dhe dëshira e saj për të punuar sa vjen e shtohet. Ndaj e vetmja gjë që na mbetet, është të ulemi e të shohim suksesin e saj, sepse Çiljeta është kthyer për të marrë fronin e mbretëreshës së showbiz-it, në të cilin ka qëndruar ulur për shumë vite…
