Një deklaratë e fortë ka ndezur debat në skenën muzikore shqiptare. Evi Reçi, këngëtare dhe moderatore, e cilësoi Festivali i Këngës në RTSH si një nga edicionet më të dobëta në historinë e tij të gjatë. Duke folur në podkastin e Santana Çomorës “Për veten”, Reçi u shpreh fjalë për fjalë: “Festivali i 64-të i Këngës në RTSH ishte më i vakëti. Nuk kishte energjinë e bukur, nuk kishte asgjë që unë ta shijoja. Kisha sjellë një këngë të ndjeshme, që nuk mori vëmendjen e duhur, vlerësimin e duhur, emocionin e duhur. Emocioni shkoi vetëm të publiku, sepse e pashë, komentet që bënin njerëzit. Si festival, nuk më la asnjë lloj shije”, ka thënë ajo.
Një fjali e shkurtër, por me jehonë të gjatë në një institucion që për dekada ka qenë barometri i muzikës shqiptare.
Reçi, e njohur për pjesëmarrjet e saj në këtë festival, përfshirë edicionin e 59-të me këngën “Tjerr”, argumentoi se energjia artistike dhe forca konkurruese këtë vit nuk arritën pritshmëritë. Edhe pse ajo nuk mohoi rëndësinë historike të festivalit, toni i saj ishte i qartë, emocionet dhe dinamika e këtij edicioni nuk përfaqësuan standardin që publiku pret nga skena e RTSH-së.
Deklarata e saj ka hapur një diskutim më të gjerë mbi rolin e Festivalit në industrinë muzikore sot a mbetet ai një trampolinë reale për artistët e rinj, apo një format që ka nevojë për riformatim thelbësor? Në një kohë kur muzika shqiptare po diversifikohet dhe po konkurron globalisht, çdo kritikë nga një artiste që e njeh nga brenda këtë skenë merr peshë të veçantë.
