Përveçse si këngëtare, Lady Gaga po shijon edhe suksesin e saj si aktore në filmin ‘A star is born’. Tashmë ajo është një artiste e plotësuar në të gjitha aspektet, por duket se rruga drejt lumturisë dhe suksesit nuk ka qenë aspak e lehtë për të. Në kopertinën për revistën ‘People’, Gaga ka folur rreth gjithë rrugëtimit të saj drejt ngjitjes së majave.
Këngëtarja ka treguar se gjatë adoleshencës ka vuajtur nga bullizmi në shkollë, pasi të gjithë e tallnin se ajo kishte ëndrra të mëdha për t’u bërë në të ardhmen një personazh shumë i njohur. “Ajo kohë ka qenë një makth i vërtetë”, – ka rrëfyer Lady Gaga në intervistën e saj. Më pas këngëtarja ka kujtuar kohën kur u nis për në universitet në New York në 2005 dhe i kishte premtuar të atit se nëse gjërat nuk shkonin mirë në karrierën e saj si muzikante do të rikthehej sërish mbrapsht në shtëpi. Në fakt në atë kohë këngëtaren e ndoqi fati i keq, sepse brenda një viti humbi një marrëveshje muzikore. Megjithatë i ati nuk e detyroi të kthehej dhe Lady Gaga vazhdoi të merrej me muzikë duke performuar në skena të ndryshme. Gjithsesi këngëtarja ka thënë se atëherë askush nuk e merrte për seriozisht, sepse njerëzit mendonin se ajo nuk ishte aq e bukur sa për t’u bërë një ‘pop star’. Por pas shumë përpjekjesh ajo ja doli dhe tani emri i saj përmendet kudo si një artiste e kompletuar. /revistawho.com
