“Produkt 28” ka qenë një nga grupet e preferura të publikut nga viti 2002 e deri në periudhën kur tre artistët: Fabian Basha, Turjan Hyska dhe Alban Kondi, ishin aktivë në muzikë. Ata kanë prodhuar hite të shumta gjatë atyre viteve dhe shumë këngë vazhdojnë të dëgjohen me nostalgji nga adhuruesit e grupit muzikor. Shumë fansa kanë kërkuar që grupi të rikthehet sërish në skenë, por asnjëherë nuk ka pasur një përgjigje nga ana e tre pjesëtarëve. Ditën e sotme, Fabian Basha, ka dhënë një sinjal se ndoshta në të ardhmen tre djemtë mund të bashkohen sërish. I ftuar në emisionin “Ditë e re” ai ka thënë se ata nuk u shkrinë asnjëherë si grup, por vendosën të bënin një pauzë. Kur u pyet nëse e kanë menduar të rikthehen edhe njëherë, Fabiani tha se asnjëherë nuk i dihet.
“Muzika ka ndryshuar shumë. Nëpër botë nuk ka më grupe muzikore djemsh. Një gjë që më jep shpresë është se rikthimi i ‘West Side Family’ u prit shumë mirë nga publiku. Njerëzit kanë akoma nostalgji për atë periudhë. Nuk i dihet kurrë” , – ka thënë Fabi. Ai ka shtuar se me djemtë e grupit vazhdon të ketë marrëdhënie miqësore, pavarësisht se kanë angazhime të shumta. “Produkt 28” u bë shumë i njohur në fillim me këngën “Trokas” në “Kënga Magjike” dhe më pas prodhoi hite të tjera si: “Fama”, “Shqipe”, “Tre shokët”, “Missi im” etj. /revistawho.com
