Edhe pse i hapur para kamerave, Apartamenti 2 XL ka hapësirat e veta private, ku zhvillohen ngjarje që nuk shfaqen në ekran. Megjithatë, Jul Deda i mbijetuari i këtij programi humori nga themeluesit e tij, ka nxjerrë në sipërfaqe disa prej këtyre episodeve, siç është largimi i Ermal Mamaqit dhe Gent Zenelajt.
Juli ka qenë i ftuar në Oktapod ku ka zbuluar që Gentian Zenelaj ishte larguar në mes të programit. Ndërsa Ermali kishte lajmëruar shumë kohë më parë që do largohej, Genti e kishte braktisur emisionin në mes të tij.
“Genti është larguar ne momentin me te keq, duke e lënë spektaklin përgjysmë. Ermali largimin e tij e ka komunikuar shumë kohë para se të lëvizte. Të lësh spektaklin përgjysme siç beri Genti, do te thotë ta lësh tjetrin ne baltë”, ka thënë Juli.
Aktorët duket se ende nuk janë sqaruar plotësisht për këtë largim. Juli u pyet për marrëdhëniet aktuale me Gentin dhe zbuloi që ai episod ka mbetur si një krisje në marrëdhënien e tyre. “Bën mirë që ma bën këtë pyetje, por Genti kështu ka qenë gjithmonë, me të papritura. Edhe sot e kësaj ditë, unë do të doja një ballafaqim me të, për të kuptuar arsyen se përse u largua ashtu”.
Treshja që nisi të interpretonte bashkë në Portokalli e që më pas u zhvendos te Apartamenti 2XL duket se tashmë po ndjek rrugë të ndara. Ermali dhe Genti janë ritakuar në të njëjtin televizion me programe të ndryshme, ndërsa Juli vazhdon në Vizion Plus Apartamentin 2XL./ class
