Në kopertinën e revistës “Story” këtë muaj qëndronte Ledion Liço. Moderatori i “The Voice” ka bërë një rrëfim të gjatë, ku përveç jetës profesionale, nga e cila zbulohet se do të nisë një program të ri stil ‘talk show’, ka rrëfyer edhe marrëdhënien e tij intime me Sara Hoxhën, një nga trashëgimtaret e televizionit ku ai punon. Ledioni thotë se është një romantik i pandreqshëm dhe se Sara është gjysma e tij.
Fejesa me Sara Hoxhën
“Nuk kishte një ceremoni, ishte diçka private. Unaza ka një vlerë modeste dhe ne jetojmë bashkë që nga fillimi i vitit”, – ka rrëfyer moderatori. Sa i takon këshillave që i japin njëri-tjetrit, Sara e këshillon Ledionin të jetë më pak arrogant në punë, ndërsa ai e këshillon atë që të mos rrëmbehet. Pyetjes në është apo jo Sara shpirti i tij binjak, Ledioni i përgjigjet kështu: “Është gjithçka. Është arsyeja pse zgjohem çdo ditë. Është hera e parë në jetë që ndjehem sikur kam takuar shpirtin binjak, ose një variant të vetes sime, 10 vjet më parë”, – thotë ai, ndërsa pranon se udhëtimi më i bukur ka qenë ai që kanë bërë kur askush nuk e dinte. “Udhëtimi ynë i parë, kur nuk dilnim në publik, sepse ishte ende sekret. Dhe shkuam diku ku mund të putheshim pa e vrarë mendjen”.
Pasuria
Ledioni është përgjigjur në intervistë edhe për pasurinë. “Pasuria ime? Kam një makinë timen, pas 5 vitesh kredi. Jetoj me qera, prej 3 vitesh, por të paktën jetoj vetëm, gjë që më ka rritur dhe ndryshuar shumë, them se për mirë. Bëj pushime një ose dy herë në vit. Nuk kam asnjë para të kursyer në bankë. Çdo para që kam fituar deri më tani, e kam shpenzuar për të bërë qejf, gjë që mbase duhet të ndryshojë, sepse asnjëherë nuk i dihet”.
Marrëdhënia me Vjollca Hoxhën
Ai ka folur edhe për thashethemet që qarkullojnë në media e që aludojnë për një forcim të pozitave të tij, duke thënë se asgjë nuk ka ndryshuar pavarësisht fejesës së tij me Sara Hoxhës. Lidhur me marrëdhënien e tij me bashkëshorten e të ndjerit Dritan Hoxha, Ledioni thotë: “Komunikimi me Vjollca Hoxhën, profesional dhe familjar, i ndajmë shumë mirë gjërat. Jam shumë i lumtur dhe jam i mirëpritur në familje dhe jemi shumë të lidhur me njëri-tjetrin”.
Miqësia me Arbana Osmanin dhe Xhemi Shehun
Ndërkaq Ledioni është përgjigjur edhe për thashethemet mbi prishjen e marrëdhënies me Arbana Osmanin dhe Xhemi Shehun. “Kam një marrëdhënie më pak intensive, sepse tani jam i fejuar dhe kam impenjime të tjera. Nuk jetojmë më në të njëjtën lagje, takohemi më rrallë, por jemi miq”, – ka thënë ai.
