Mbrëmjen e nesërme, në ekranin e Top Channel rikthehet fenomeni televiziv që mban të mbërthyer publikun shqiptar kudo ndodhet: Big Brother VIP, tashmë në edicionin e tij të pestë. Me dritat që do të ndizen në shtëpinë më të famshme në vend, pritet një start i mbushur me emocione, surpriza dhe dinamika të reja.
Nën drejtimin e Ledion Liços, reality show më i ndjekur i viteve të fundit premton një sezon ndryshe nga të gjithë të tjerët. Krahas moderimit, nuk do të mungojnë as komentet dhe analizat e opinionistëve, që prej vitesh janë pjesë thelbësore e spektaklit.
Kurioziteti për atë që do të ndodhë është i madh dhe vetë Ledioni ka dhënë disa sinjale për çfarë e pret publikun. Ai thekson se Big Brother-i ka tejkaluar prej kohësh kufijtë e një programi televiziv:
“Big Brother-i është një ngjarje më shumë se sa një program televiziv. Është një ngjarje që na bashkon të gjithëve, mund të presim nga të gjitha ngjyrat si në çdo sezon tjetër. Do të ketë shumë surpriza, do të ketë gjëra që do të ndodhin për herë të parë.”
Por surprizat nuk mbarojnë këtu. Një tjetër element që pritet të tërheqë vëmendjen që në natën e parë është vetë ambienti ku do të zhvillohet loja. Sipas Ledionit, këtë vit publiku do të shohë versionin më mbresëlënës të shtëpisë së Big Brother-it.
“Jam shumë entuziast për shtëpinë, si kurrë ndonjëherë jam i lumtur të them që kjo është shtëpia më e bukur që Big Brother ka patur ndonjëherë jo vetëm në edicionet e tij VIP. Uroj vërtetë që të jetë fillim i një aventure tjetër të paharrueshme, aty ku aventurat janë të gjitha të paharrueshme në Top Channel.”
