Ta quajmë 8 Marsin ditën e grave të forta, të brishta, të ëmbla, të bukura, të famshme, të lira, të qeshura…? Ta quajmë ditën e supergrave apo të gruas që s’do fare të jetë e tillë? 8 Marsi i të gjitha këtyre bashkë apo i asnjërës prej tyre? Ne nuk duam t’i fusim gratë e vajzat tona nëpër kallëpe, heroina qofshin apo të papërsosura. Ne duam vetëm të festojmë për gruan dhe të kemi një simbol të thjeshtë të numrit 8, që u takon të gjithave atyre që na shkëlqejnë në sy, por ne kemi përzgjedhur 8, që këtë vit kanë shkëlqyer në sytë e të gjithëve. 8 për 8 fusha të ndryshme, 8 gra e vajza që do t’i zbulojmë një nga një gjatë ditës së sotme…
Kur vjen puna tek gratë në politikë, pritshmëria është vetëm një: në mos më mirë sesa burrat, së paku të mos e bëjnë më keq. Ngjan denigruese, sigurisht, sepse politika në Shqipëri vijon të mbetet shumë e lidhur me jetën e përditshme, më e shara, më e mallkuara dhe ajo pa të cilën duket se nuk bën askush. Dhe sigurisht, e mbizotëruar nga burrat, nga tonet e forta, në shumicën e kohës nga gratë që duhet të “burrërohen” që të pranohen, që t’ia dalin, që të mos duhen kukulla, edhe kur janë zonja.
Lindita Nikolla mban postin më të lartë, në një Republikë Parlamentare siç është Shqipëria, ajo është numri dy i shtetit, kryetare e Kuvendit. Zgjedhur në këtë post të lartë në shtator të vitit 2021, pas një angazhimi rreth 20-vjecar në politikë, është e dyta grua shqiptare që drejton Parlamentin, pas Jozefina Topallit. Pa tonet e forta të kësaj të fundit, por me të njëjtin angazhim për ta kthyer Kuvendin e Shqipërisë në një qendër që përfaqëson shumë nga nismat për fuqizimin e gruas dhe shtresave më të dobëta të shoqërisë shqiptare, Lindita Nikolla ka treguar se shumë punë të mira mund të bëhen dhe me tone të buta.
E martuar me profesorin e dikurshëm të matematikës (lëndë për të cilën ka studiuar edhe vetë) dhe nënë e një vajzë, Nikolla i numëron me gishtat e njërës dorë intervistat personale përgjatë gjithë karrierës së saj dhe ka në fokus të çdo daljeje publike vetëm punën e saj në Parlament dhe gjithë veprimtaritë e tjera të lidhura me të, duke të krijuar idenë e një zonje që bën pjesë në politikën e Evropës veriore dhe jo në Shqipërinë e zhurmshme ku gratë duhet të marrin tone burrërore që të pranohen.
