Pak ditë pas triumfit në Big Brother VIP Kosova, fituesi i edicionit, Londrim Mekaj, u rikthye në shtëpinë më të famshme për episodin special “Post Big Brother”, dhe këtë herë jo si lojtar, por si simbol i një rruge që preku publikun. Atmosfera ishte e ngarkuar emocionalisht, me rrëfime të sinqerta dhe reflektime për gjithçka ndodhi brenda dhe jashtë kamerave. Por momenti që mbeti ishte fjala e tij, e thënë me zë që dridhej.
“Nuk ka rëndësi kush je apo nga vjen. Thjesht ndiqe ëndrrën, sepse një ditë ajo realizohet,” u shpreh ai, duke theksuar se suksesi nuk lidhet me prejardhjen, por me besimin dhe këmbënguljen. Një mesazh i drejtpërdrejtë që shpjegon edhe arsyen pse publiku e çoi deri në fund, duke i dhënë fitoren dhe çmimin e madh prej 124,000 eurosh.
Në renditjen finale, vendi i dytë i takoi Eljona Binakaj, i ndjekur nga Ludo Lee në vendin e tretë, Klodian Mihaj në të katërtin dhe Hygerta Sako në të pestin. Por përtej klasifikimit, ishte historia personale ajo që dominoi mbrëmjen, historia e një djali që e ktheu eksperiencën televizive në platformë shprese.
