Reperja e njohur me origjinë shqiptare, Loredana Zefi, ka konfirmuar tërheqjen e saj nga edicioni i këtij viti i Sunny Hill Festival, që po mbahet aktualisht në Prishtinë. Ndonëse ishte pjesë e line-up-it të publikuar më 16 maj, emri i saj është zhdukur nga listat e mëvonshme, duke ngritur dyshime dhe shqetësim tek fansat.
Përmes një mesazhi të postuar në InstaStory, Loredana ka bërë të ditur se arsyet janë personale, duke shprehur keqardhjen që nuk do mund të performojë për publikun e saj në Kosovë.
“Me keqardhje nuk do të mund të jem pjesë e festivalit këtë vit për arsye personale, por jam e sigurt që do të jetë një përvojë e jashtëzakonshme për ju. Shpresoj ta vizitoj në të ardhmen!”, ka shkruar ajo.
Në të njëjtën kohë, artistja ka shprehur krenarinë e saj për zhvillimin e skenës muzikore shqiptare dhe për vetë festivalin, i cili është kthyer në një ngjarje ndërkombëtare të rëndësishme për rajonin.
Megjithëse mungesa e Loredanës do të ndjehet, organizatorët kanë premtuar një edicion spektakolar, me emra të tjerë të mëdhenj që do të performojnë në skenën e Sunny Hill.
