Luana Vjollca ka shënuar një tjetër moment të rëndësishëm në karrierën e saj ndërkombëtare, duke u shfaqur në kopertinën e revistës prestigjioze L’Officiel United Kingdom. Revista britanike i kushton një portret të fuqishëm moderatores, këngëtares dhe sipërmarrëses shqiptare, duke e përshkruar si shumë më tepër sesa një figurë televizive.
Sipas L’Officiel UK, Luana është “një forcë e vetë-autorisë”, një grua që ka ndërtuar karrierën e saj mbi disiplinën, intuitën dhe vetëdijen për vlerën personale. Me mbi dy dekada eksperiencë në televizion, muzikë, shkrim dhe së fundmi në modë, ajo ka arritur të krijojë një profil unik, të qëndrueshëm dhe të dallueshëm.
Revista ndalet edhe te rrugëtimi i saj në ekran, nga drejtimi i disa prej formateve më të ndjekura në Shqipëri, deri te hapi i guximshëm në industrinë e modës me markën LU7U, e cila përfaqëson feminitetin e fuqishëm, të ndërtuar me qëllim dhe identitet të qartë.
Filozofia e Luanës përmblidhet në një mesazh të drejtpërdrejtë dhe pa frikë: “Thuaje. Zotëroje. Jetoje.” Një qasje që, sipas revistës, reflektohet në çdo rol që ajo merr dhe në çdo projekt që ndërton.
L’Officiel UK thekson se përmes punës dhe imazhit të saj, Luana Vjollca i inkurajon gratë të duan lëkurën e tyre, t’i besojnë zërit që kanë dhe të zgjedhin vetëbesimin sipas rregullave të tyre.
Një tjetër arritje që e pozicionon Luanën jo vetëm si një emër të njohur në Shqipëri, por si një figurë me ndikim edhe në skenën ndërkombëtare.
