Luana Vjollca ka dëshmuar edhe një herë suksesin e saj gjatë paraqitjes së fundit në Dubai, ku mori pjesë në një sërë eventesh, dhe spikati veçanërisht në “Dubai Mall Fashion Festival”.
Prania e Luanës në festival tërhoqi menjëherë vëmendjen e mediave arabe, disa prej të cilave e veçuan si një nga personalitetet më të përfolura të eventit. E njohur për stilin e saj të veçantë dhe imazhin e fortë publik, Luana tërhoqi vëmendjen si në skenë ashtu edhe jashtë saj, duke përforcuar statusin e saj në botën e modës dhe jo vetëm.
Në festival, i cili mblodhi themelues të modës, krijues dhe drejtues të industrisë, Luana iu bashkua një paneli të dedikuar sipërmarrjes dhe inovacionit. Ajo ndau përvoja nga rrugëtimi i saj nga bota e argëtimit drejt modës, duke folur për krijimin e markës së saj “LULU”, një brand që pasqyron vetëbesim, feminilitetin dhe elegancën moderne.
E konceptuar me vizionin për të fuqizuar gratë, “LULU” përfshin silueta të strukturuara, dizajne të frymëzuara nga korsetet dhe materiale cilësore të përzgjedhura nga tregje ndërkombëtare. Marka është përqafuar shpejt nga adhuruesit e modës, duke shënuar kërkesë të lartë që nga dita e parë e lancimit. Luana mbetet e përfshirë personalisht në çdo aspekt të markës, nga dizajni dhe brendimi deri në detaje.
Mediat arabe vlerësuan jo vetëm vizionin e saj sipërmarrës, por edhe aftësinë për ta shndërruar ndikimin e saj si personazh publik në një sipërmarrje të besueshme në fushën e modës. Pjesëmarrja e saj në Dubai “Mall Fashion Festival” konfirmoi edhe një herë evolucionin e saj nga ikonë televizive dhe këngëtare në një sipërmarrëse mode që po lë gjurmë në skenën ndërkombëtare.
Momenti i Luanës në Dubai ishte më shumë se një paraqitje, ishte një deklaratë se çdo grua mundet.
