Çështja për restaurimin e Teatrit Kombëtar, ka tërhequr vëmendjen e medias dhe kryesisht të artistëve këto muajt e fundit. Ditën e sotme shumë prej aktorëve të njohur, midis tyre edhe Robert Ndrenika, Luftar Paja dhe Reshat Arbana kanë realizuar një takim me kryetarin e Bashkisë së Tiranës, Erion Veliaj dhe Ministren e Kulturës, Mirela Kumbaro.
Gjatë diskutimeve lidhur me këtë çështje, në fjalën e tij aktori Luftar Paja ka thënë se është për një teatër të ri, por problemi nuk është tek llaçi dhe tullat por tek respekti ndaj punës së njëri-tjetrit.
“Duke respektuar mendimet e kolegëve. Unë jam për teatër të ri. Por që të kemi këtë teatër, mua nuk më vjen mirë që ne si artiste harrojmë gjënë kryesore dhe merremi me llaçin dhe tullat. Ka kush përgjigjet për këto. Ne duhet të shtojmë forcat për betonin dhe llaçin artistik. Ja e bëmë teatrin ne, por a e kemi ne një Romeo dhe Zhuljetë që të demostrojë në atë teatër. Kjo është e thellë, sepse duhet të fillojë që nga Universiteti i Arteve, kush jep mësim atje dhe çfarë bëjnë dhe për të ardhur më pas tek llaçi dhe tullat. Më vjen keq që lokalizohet, Tirana, Shkodra etj. Teatri Kombëtar e ka emrin Teatër Kombëtar, dhe duhet të vijnë jo vetëm ata që jetojnë në Tiranë, por të gjithë ata që e meritojnë. Teatri është i të gjithëve.”-ka thënë Paja./revistawho.com
