Gazetarja e njohur Rezarta Reçi është ndarë nga jeta ditën e sotme, në moshën 64-vjeçare.
Prej vitesh ajo përballej me kancerin e gjirit, një betejë të cilën e kishte ndarë vazhdimisht me publikun, duke shprehur shpesh se “do të luftonte gjatë”. Rrugëtimin e saj profesional e nisi në radio më shumë se 30 vite më parë, për të vijuar më pas me prezantimin e emisioneve të ndryshme televizive dhe me autorësi të shumta.
Vitet e fundit, Rezarta Reçi iu përkushtua edhe shkrimit të librave. Ajo është autore e veprave “Kolonë Zanore” dhe “Zhbërja”, si dhe e disa botimeve të tjera me intervista dhe rrëfime personale, ku pasqyronte përvojat e saj jetësore dhe profesionale.
Në një postim në rrjetet sociale, familjarët e saj njoftojnë:
“Rezarta jonë u shua në paqe mes njerëzve të zemrës, dashurisë, respektit dhe përkushtimit të miqve, të afërmve dhe mjekëve që i qëndruan pranë në të gjithë sfidën e saj të viteve të fundit.
Pritja do të bëhet pranë Agjencisë Funerale ‘Univers’, rruga ‘Bardhyl’, nga sonte ora 20:30 deri në përcjelljen për në banesën e fundit, nesër, më datë 2 shkurt 2026, ora 15:00, në Tiranë.
Me respekt, familja Reçi.”
Rezarta Reçi do të kujtohet jo vetëm për kontributin e saj të gjatë në gazetari, por edhe për qëndresën dhe kurajon me të cilat përballoi sëmundjen e rëndë, duke mbetur një shembull i përkushtimit ndaj jetës dhe profesionit deri në ditët e fundit.
