Gjysmëmaratona e Tiranës, për të dytin vit radhazi ka bërë pjesë të saj plot 2500 garues, mes të cilëve emra të njohur të sportit, politikës, artit dhe fushave të ndryshme të jetës. Edicionin i dytë i këtij aktiviteti sportiv ka qenë në një nivel europian dhe botëror.
Mes fituesve, e para për femra në Kategorinë e Gjysmëmaratonës, pra 21 km, ishte kampionia e atletikës shqiptare, Luiza Gega, e cila përmirësoi rekordin kombëtar këtë vit me 9 minuta: “Jam shumë e kënaqur me rezultatin e arritur. Në fakt, mendoja se do ta thyeja me rreth 6 minuta rekordin, por bëra edhe më mirë dhe theva me 9 minuta rekordin kombëtar. Më vjen shumë mirë për këtë gjë”,- tha Luiza Gega për mediat.
Ndërsa e papritura ishte rezultati i kryebashkiakut të Tiranës, Erion Veliaj, i cili kishte disa muaj që përgatitej për këtë maratonë. Dhe ia ka dalë të lërë pas edhe ish-kapitenin e Kombëtares së Futbollit, Lorik Cana. Cana garonte në të njëjtën kategori si kryebashkiaku Veliaj, në 10 kilometra. Por ajo që ra në sy në përfundim të garës ishte rezultati i Lorikut, i cili ndonëse ruan ende formë të mirë sportive, ka mbetur pas Veliajt.
Cana e përfundoi garën e tij me kohën 1. 00.52.066, ndërsa kryebashkiaku Veliaj 1 minutë e 47 sekonda më shpejt, duke arritur kohën 0. 59.05.186.
Në Maratonën e Tiranës morën pjesë edhe anëtarë të trupit diplomatik të akredituar në Tiranë, si ambasadori japonez, Makoto Ito, i cili garoi në kategorinë e 10 kilometrave duke u renditur 164 me 54 minuta e 57 sekonda. Ndërsa ambasadori austriak, Johan Sattler, garoi në kategorinë profesioniste prej 21 km, ku u rendit i 150 me 1 orë e 56 minuta. / Revista Class
