“Ndonjëherë udhëtimet më të bukura janë ato që nuk i planifikojmë.”
Këtë ndjesi na e dhuron pikërisht Luli & Goni i Lemes , një përvojë kinematografike plot ngjyra, humor dhe ndjeshmëri që ndjehet e freskët dhe autentike.
Nën regjinë e Bjordi Mezini dhe skenar të Klaudia Brahimaj, Luli & Goni i Lemes ndjek aventurën plot kaos të Lemes, një nënë e vendosur për të gjetur nusen ideale për të birin, Gonin, një djalë i ndrojtur dhe i lidhur ngushtë me të ëmën. Por planet e tyre marrin një kthesë të papritur kur takojnë Lulin, një karakter naiv dhe i dashur që kthehet nga Anglia, dhe që me sinqeritetin e tij sjell një rrëmujë të pandalshme.
Kimia mes aktorëve është e pakrahasueshme. Aurela Gaçe shkëlqen në rolin e Lemes, një grua e fortë që sjell një balancë perfekte mes komedisë dhe dashurisë së një nëne. Deivis Myslymi sjell butësi dhe sinqeritet në rolin e Gonit, ndërsa Margent Caushi si Luli është një burim i pashtershëm të qeshurash. Një tjetër shtesë e bukur është Sara, rol që luhet nga Fjoralba Ponari, vajza që i rrëmben zemrën Gonit, duke i dhënë filmit një dimension të ngrohtë dhe romantik.
Filmi ofron një atmosferë të gjallë udhëtimi dimëror dhe një kolonë zanore magjepsëse që të lidh ngushtë me shpirtin shqiptar, shto këtu këngët HIT të Aurela Gaçes.
Por Luli & Goni i Lemës është më shumë se një komedi. Nën të qeshurat, ai trajton tema universale: përplasjen mes traditës dhe modernitetit, nevojën për përkatësi dhe guximin për të ndjekur zemrën tënde. Është një film që të bën të qeshësh me lot dhe në të njëjtën kohë të prekë thellë me ndjeshmërinë e tij.
Në një kohë kur kinematografia shqiptare po kërkon vendin e saj në arenën ndërkombëtare, Luli & Goni i Lemës është një dëshmi se sa të fuqishme dhe prekëse mund të jenë historitë tona kur tregohen siç duhet.
Ne javën e tij të tretë në kinema, filmi vazhdon të tërheqi qindra shikues në ditë në Shqipëri dhe Suedi dhe Zvicër. Nga data 9 Maj, si pjesë e turneut Europian, do të shfaqet edhe në kinemate e Austrisë dhe 25 Maj në Bruksel.
Ky film është një ftesë për të qeshur, për të reflektuar dhe për të kujtuar se, pavarësisht sa e ndërlikuar mund të jetë jeta, gjithmonë ekziston një rrugë që të çon drejt gëzimit.
Siç thotë edhe personazhi i Gonit: Njeriu ndonjëherë humbet diçka për të gjetur diçka më të bukur.
Por ka përjashtime: Përshembull nëse humbisni mundësinë për të parë këtë film, nuk ka garanci që do gjeni më të mirë.
Vlerësimi final:
Një udhëtim i freskët, plot humor dhe ndjenjë, që do t’ju mbushë zemrën dhe do t’ju lërë një buzëqeshje të ngrohtë gjatë gjithë ditës.
