Ish-miqtë e ngushtë Ermal Mamaqi dhe Julian Deda, kanë shkëmbyer disa kritika të rënda për njëri-tjetrin në publik. Gjithçka nisi kur Juli ironizoi në mënyrë indirekte trajnimet dhe videot motivuese të Ermalit, duke i quajtur sektizma dhe duke u shprehur:
“Sa janë shtuar këta mentorët që na tregojnë se e kemi brenda vetes, por na u dashkan ata që ta zbulojmë. Paguajnë njerëzit mijëra euro për këto gjëra.”
Në një reagim të gjatë, Ermali i dërgoi mesazh publik Julit, duke theksuar se trajnimet e kanë ndihmuar personalisht dhe duke e ftuar të marrë pjesë në një prej tyre:
“Jul, këto teknika funksionojnë, i kam përdorur vetë për të përmirësuar veten dhe biznesin tim dhe për tu bërë më i suksesshëm. Po nuk të pëlqeu, unë dal nudo te sheshi Skënderbej. Po të pëlqeu, më paguan një drekë.”
Në fund, Juli vuri në pikëpyetje suksesin e Ermalit pas këtyre trajnimeve dhe i bëri një kritikë të sinqertë:
“Ke qenë më i suksesshëm apo je bërë më i suksesshëm, kjo ha diskutim. Mbaj mend, kur nisi ‘Portokallia’ dhe ‘2XL’, boshatiseshin rrugët. Ky është sukses. I mungon publikut Ermali i batutës, Ermali i çiltër!”
Ka shumë nga ata që po vënë në dyshim vërtëtsinë e këtij debati duke i akuzuar të dy humoristët që po e përdorin vëmendjen për projektin e tyre më të ri. Dyshimet u shtuan pasi në mesazhet e tyre respektive, si Juli dhe Ermali flasin për një ribashkim të mundshëm të grupit SHBLSH, si një mënyrë e mundshme për të ulur gjakrat. Mbetet për t’u parë nëse kjo do të ndodhë.
