Majlinda Bregun e pickon grerëza, ankohet te Beqja për ultrakortenin!

Duket se një grerëz nuk është treguar aspak miqësore me deputeten Majlinda Bregu. Kjo e fundit është paraqitur dje në ambientet e Poliklinikës së Specialiteteve nr. 3 në Tiranë për të bërë një ultrakorten për shkak të pickimit nga ky insekt. Mësohet se deputetja Bregu ka shkuar me “mik” në këtë Poliklinikë, duke shkelur sistemin e referimit. Mirëpo, pavarësisht dëshirës së mirë për t’i shërbyer, Bregu ka hasur në një incident të pakëndshëm. Nuk ka pasur ultraktorten, shkruan “Shendet +”. Një mungesë e tillë i është dukur skandaloze deputetes, e cila mësohet se është ankuar deri tek ministri i Shëndetësisë, Ilir Beqaj. Beqaj është interesuar personalisht për rasti në fjalë, duke u tërhequr vëmendjen drejtuesve të këtij institucioni që ky incident të mos përsëritet më. E kontaktuar nga gazeta “Shëndet+”, drejtuesja e kësaj Poliklinike, Valdete Malaj shprehet se ultrakorten ka pasur por nuk ka qenë i ekspozuar. “Ultrakorteni ka qenë në Poliklinikë. Madje ne e kemi të shpërndarë në të gjitha shërbimet, te alergologjia, urgjenca, infektivi. Në momentin kur deputetja është paraqitur nuk ka pasur ultrakorten të ekspozuar, sepse sa i është injektuar një pacienti tjetër. Por, ka pasur në çantën e urgjencës. Shërbimi i është dhënë me shumë korrektesë. Dhe vetë deputetja është larguar shumë e kënaqur” është shprehur Malaj për “Shëndet+”. Mungesa të tilla si ultrakorteni, sigurisht që janë të pajustifikueshme. Mirëpo, reagimi dhe shqetësimi i ministrit të Shëndetësisë duhet të jetë i njëjtë për të gjithë qytetarët. Nëse shteti do të shqetësohej për jetën e qindra fëmijëve të prekur nga kanceri njësoj si për shëndetin e deputetes së pickuar nga grerëza, shëndetësia do të kishte tjetër fytyrë.