Një nga lajmet më të bujshme të vitit 2016-të ishte pikërisht dhuna qe pësoi një vogëlush në një kopësht privat, nga administratorja e tij Anjeza Shabani. Ky lajm shkaktoi indinjatë publike pas shfaqjes së imazheve të dhunës në emisionin “STOP” në Tv Klan. Muaj pas ndodhisë, Anjeza Shabani po kryen dënimin me dy vite burg. Por ne sot kemi një lajm shumë të mirë nga vogëlushi, i cili ka nevojë për ndihmën e ekspertëve për të kaluar mbi pasojat e dhunës psikologjike që i është ushtruar. Dhe ekspertët e fondacionit të suksesshëm “Fëmijët Shqiptarë” janë gati. Gjithçka është dhuratë e modeles e blogeres bukuroshe Armina Mevlani e cila ka marrë përsipër të mbulojë të gjitha shpenzimet për vogëlushin. Gjestin e rrallë të Arminës, e cila i ka kthyer buzëqeshjen të voglit e prindërve të tij, e bëri publik vetë Fondacioni në llogarinë zyrtare të “Facebook”. “Vogëlushi që preku zemrat e mijëra shqiptarëve për shkak të dhunës që pësoi nga administratorja e një kopshti privat, (denoncuar nga emisionini investigativ “STOP”), tani do të jetë pjesë e shërbimeve të Qëndrës Rajonale të Autizmit në Farkë. I shoqëruar nga prindërit, ai ju bashkangjit festës tradicionale të fundvitit që Fondacioni Fëmijët Shqiptarë organizon për fëmijët e qëndrave të autizmit, duke gëzuar së bashku me ta. Pas vlerësimeve të bëra nga stafi i specialistëve të Qëndrës Rajonale të Autizmit, ditën e hënë ai do të fillojë terapinë ABA . Kjo terapi do të ofrohet falas për vogëlushin ndërkohë që kostot e shërbimit në Qëndër do të mbulohen nga Armina Mevlani. 4-vjeçari që përloti shumë nëna shqiptare brenda dhe jashtë kufijve të vendit, falë kujdesit të prindërve që i kanë qëndruar shumë pranë gjatë kësaj kohe, sot i është kthyer buzëqeshja dhe qetësia”, shkruan Fondacioni Fëmijët Shqiptarë. Siç dihet Presidentja e Fondacionit “Fëmijët Shqiptarë” është gruaja e ish- Kryeministrit Sali Berisha, Liri Berisha. Ajo është njëherësh edhe vjehrra e Arminës. Ky bashkëpunim tregon gjithashtu edhe për marrëdhënien e mirë të të dyjave.
