“Komedi në errësirë” është një nga veprat e Peter Shafer, ngjarjet e së cilës zhvillohen në Londrën e viteve `60 dhe ka sjellë për publikun e Tiranës të qeshura pafund e situata humori që nuk do të harrohen lehtë. Karaktere interesante dhe vendosje rolesh që as që i kishim imagjinuar, është një nga pikat e forta të kësaj vepre. Regjisorja Najada Elmazi është treguar e kujdesshme që çdo personazh të kishte shkëlqimin e tij që vepra të vinte sa më e plotë tek shikuesit. Dehja thonë se është gjendja më sublime e njeriut pasi tregon në të vërtetë atë që ti je dhe “dehja artistike” që Marjana Kondi tregoi në skenë e mishëroi më së miri atë. Një batutë tek – tuk që thumbonte dhe lidhte gjithë dinamikën e ngjarjeve, kripa që i lepte lezetin asaj rrokopuje që u krijua brenda një shtëpie thuajse në errësirë, dha dozën e duhur të humorit për të gjithë artdashësit. Kasti i aktorëve përbëhet nga Gentian Zenelaj, Laura Nezha, Marjana Kondi, Mehmet Xhelili, Laert Vasili, Eglantina Cenomeri, Gerald Sejdini dhe Karafil Shena. Kostumografia u realizua nga Realda Malo, skenografia nga Beqo Nanaj dhe as. regjisore Elvana Elmazi./revistawho.com
