Maria De Filippi është një nga prezantueset italiane më të njohura në Shqipëri, por, pak nga ne e dinë që ajo është mamaja e një djali të adoptuar, Gabriele-s. Madje marrëdhënia mes tyre, është si e çdo nëne me djalin e saj.
“Kam qenë një mama shumë ndërhyrëse. Pastaj erdhi një çast kur ai më tha “ndal” dhe kam bërë prapa…Por megjithatë kam gjetur mënyrën për t’u informuar për atë që bën”, ka thënë ajo për “Corriere.it”, shkruan “Class”.
Ata janë një familje si gjithë të tjerat, që kanë kaluar shqetësimet e kuptueshme gjatë adoleshencës së djalit, por edhe janë ndier krenarë për të, siç e ka shprehur Maurizio Costanzo, bashkëshorti i Maria de Filippi-t në një intervistë për Chi, gjatë pushimeve në Ansedonia, në 2013, kur Gabriele mbushi 21 vjeç:
“Këtu në Ansedonia e kemi parë djalin tonë të rritej mes dashurive të para, konfidencave dhe zhgënjimeve të vogla. Ka qenë pikërisht koha e kaluar këtu që më ka lejuar ta njoh më shumë, të njoh një fëmijë që tani është bërë burrë. Kam parë Gabriele-n të rritet, të mbyllë studimet, të komunikojë dhe punojë. Dhe përmes heshtjeve të tij, emocioneve dhe ndonjë zbulimi nga ana e Maria-s, kam jetuar dashuritë dhe zhgënjimet e tij të para. Sapo Gabriele niste një histori me një vajzë, mua më dukej e duhura, ndëkohë ata ndaheshin”.
Po çfarë dihet për djalin e Maria-s dhe Maurizio-s? Gabriele Costanzo eshtë adoptuar që kur ishte 12 vjeç, në vitin 2004 nga Maria de Filippi dhe bashkëshorti i saj, i cili ka edhe dy fëmijë më të rritur nga martesa e parë. Sot, në moshë 24 vjeçar, punon në redaksinë e emisionit të drejtuar nga Maria de Filippi “Uomini e Donne”. Për të, dihet me të vërtetë pak, ato që zbulohen nga ndonjë foto e pushimeve të familjes, por edhe ato që thuhen në intervista nga prindërit. Dhe e para gjë për t’u theksuar është që Maria është një mama shumë e dashur dhe shumë xheloze, edhe Maurizio nuk mbetet pas dhe është edhe shumë i kujdesshëm, sipas asaj që ka treguar për revistën Chi.
“I them gjithmonë të ketë kujdes kur nget dhe ai më përgjigjet që unë e di tashmë që ai është i kujdesshëm dhe duhet të kemi besim”.
Po të gjykosh nga fotot bashkë, duket që mama e bir merren vesh mirë dhe argëtohen shumë kur janë bashkë. Djali i ka dhënë një kuptim të veçantë jetës së saj dhe janë tashmë të pandarë, bashkë në shtëpi, bashkë në punë, bashkë edhe në pushime!
Costanzo Junior është një djalë i gjatë, brun dhe duket që ka humorin e të atit duke parë sa e argëton të ëmën me batuta. Maria e ndjek hap pas hapi, sidomos tani që ai ka hyrë në botën e saj dhe i jep këshilla, pa ia kursyer kurrë dashurinë.
“Gabriele më ka bërë të nxjerr një anë që e dija që e kisha, por nuk e shprehja, ka deklaruar për Chi ca vite më parë. – Është një shok i veçantë: kur ishte fëmijë përkëdhelej ai, tani rolet janë përmbysur. Është shumë i dashur, kërkon të jemi afër dhe hapet me mua”.
Ai është njeriu që ka plotësuar dhe mbushur jetët e prindërve, duke u dhënë gjithmonë e më shumë qetësi./ Class
