Një dasëm ‘firmato’ në çdo detaj, që nga dekori e kompletet e pjatave dhe padyshim, fustani i nusërisë së Mbretëreshës Geraldinë.
Mbreti Zogu porositi fustane nusërie në dy prej shtëpive më të mëdha të modës asokohe: Chanel, dhe marka angleze Worth. Në ditën e shumëpritur të dasmës,Geraldina u shfaq me fustanin e dizenjuar nga Worth, emrin e preferuar të familjeve mbretërore nëpër botë, e më pas, në altar i bëri betimet me fustanin e dizenjuar nga Chanel.
78 vite më vonë, familja Zogu pret martesën mbretërore të Princit Leka II me Elia Zaharian. Elia dhe Princi bënë publike disa prej detajeve të martesës, por mbajtën të fshehtë emrin e dizenjatorit që do të realizonte fustanin e saj të nusërisë. E megjithatë, ata zbuluan se në këtë ceremoni do të përfshiheshin prodhime nga Kosova, një prej shoqërueseve të nuses do të ishte shqiptare nga Kosova, dhe po kështu edhe dizenjatori i fustanit.
Elia Zaharia ka zgjedhur dizenjatoren kosovare Blerina Kllokoqi Rugova. Ajo është veshur edhe më parë nga Kllokoqi Rugova, në eventet mbretërore apo shërbime fotografike, dhe ia ka besuar asaj realizimin e fustanit të nusërisë. Ndoshta edhe sepse dizenjatorja karakterizohet nga një stil përgjithësisht klasik, me ngjyra të lehta, është parë si e duhura për këtë event në Oborrin Mbretëror.
Siç u shprehën Princi dhe Elia, në këtë dasëm nuk do të mund të mungojnë ato familje që kanë kontribuar në pavarësinë e Kosovës, dhe miqtë e tyre të afërt që jetojnë në Kosovë. Duket se në këtë ceremoni, oborri mbretëror po përpiqet të bashkojë të gjithë shqiptarët, dhe ndër vallet tradicionale që do të kërcehen do të jetë edhe Vallja e Rugovës.
