Martin Leka: Klipi i Eneda Tarifës kushtoi 5 mijë euro,  u keqkuptua

Drejtori i RTSH, Martin Leka u ka thënë një përgjigje të gjithë atyre që e komentuan negativisht klipin e këngës së Eneda Tarifës që konkuron në eurovizion. “Përshtypjet e para janë të mira. Klipi kushtoi 5 mijë euro dhe për ata që s’e kanë pëlqyer, unë jam indifferent”, tha Leka. Sipas tij, ata që kanë bërë dislike në yotube nuk janë të zgjuar të kuptojnë se çfarë simbolizon ai “kapuçi i kuq”, që Eneda vendos në kokë. “Pra deri kur të kuptojnë se ç’do të thotë “duvak”, një mbulesë që vendosnin nuset shqiptare dikur në kokë, s’kam ç’them. Autorët e këngës dhe regjisori e menduan si element, por që në rrjetet sociale u keqkuptua, duke u krahasuar me veshjet e serialit indian “Bidaii”, u shpreh Leka në një intervistë për ‘Panoramën’. Në lidhje me faktin se si do të jetë perfomanca në Eurovizion e Eneda Tarifës, Leka përgjigjet” “Nuk di të ketë koreografi. Eneda do të jetë në qendër dhe tre backvocalet. Mund të them që do të ketë efekte në skenë, ndërsa veshja është surprizë. Sa për pritshmëritë, ne synojmë një përfaqësim origjinal, dinjitoz të Shqipërisë. Shpresojmë në mbështetjen e gjithë shqiptarëve që jetojnë jashtë kufijve tanë politike”, tha ai. Ndërkohë që Eneda Tarifa është komentuar këtë javë në rrjetet sociale si këngëtarja që e ka kthyer “Përrallën” në një këngë horror. Ky ishte konstatimi që “WiWibloggs”, faqja më e famshme e parashikimeve dhe kritikave, dedikuar pjesëmarrësve në “Eurovision”, ka bërë mbi versionin anglisht të këngës përfaqësuese të Shqipërisë. Djemtë e blogut kanë dëgjuar të dyja versionet e këngës, duke e cilësuar versionin shqip “Përrallë”, shumë herë më të mirë sesa ai në anglisht “Fairytale”.