Babai i vrasësit të 50 personave në klubin e natës së homoseksualëve në Orlando ka deklaruar se nuk e dinte që i biri kishte urrejtje në zemrën e tij.
Seddique Mateen tha se nuk arrin të kuptojë se çfarë e ka nxitur djalin e tij të kryejë këtë masakër. Ai deklaroi se një ditë më parë, i biri ishte zemëruar, pasi kishte parë dy burra që putheshin në buzë.
Në një deklaratë të postuar në internet ku i drejtohej njerëzve të vendlindjes së tij Afganistan, tha se djali ishte një njeri shumë i mirë. Ai kishte një grua dhe fëmijë.
Ndërsa ish-gruaja e tij Sitora Yusufiy ka deklaruar se ai ishte një njeri me paqëndrueshmëri në humor dhe me një temperament të dhunshëm. Ajo tha se ishte abuzuar fizikisht nga Mateen. Sitora tregon se bashkëshorti e rrihte rregullisht gjatë martesës së tyre të shkurtër qoftë edhe për gjëra tejet të parëndësishme dhe banale si larja e rrobave apo pastrimi i shtëpisë.
Kështu rrëfen ish-bashkëshortja e tij Sitora Yusufi, e cila jetoi vetëm katër muaj me Omar Mateen në 2009. Ajo thotë se ka qenë familja e saj që e shpëtoi nga ajo marrëdhënie kur mori vesh se bashkëshorti e dhunonte atë fizikisht.
Omar Mateen vrau 50 persona dhe plagosi më shumë se 53 të tjerë dhe më pas u qëllua për vdekje nga policia. ISIS mori përgjegjësinë e sulmit, ndërsa presidenti Barack Obama e ka cilësuar një akt terrorist dhe sulm ndaj të gjithë amerikanëve./shqip/
