Një histori që duket si skenar filmi tronditi sot opinionin publik: mashtruesi i njohur i kriptovalutave, Roman Novak, dhe bashkëshortja e tij u gjetën të vrarë në Emiratet e Bashkuara Arabe.
Çifti ishte zhdukur prej një muaji, pas një takimi misterioz me investitorë në qytetin Hatta. Sipas versionit kryesor, ata u rrëmbyen për shpërblim, por u vranë pasi autorët nuk morën paratë. Një tjetër pistë sugjeron se kriminelët synonin të hynin në llogaritë e kriptomonedhave të Novak. Mediat vendase raportojnë se “trupat e viktimave u copëtuan dhe u vendosën në çanta, të cilat më vonë u lanë pranë një qendre tregtare në Hatta.”
Komiteti Hetues Rus ka hapur një çështje penale për vrasjen e dy personave. Deri tani janë ndaluar shtatë të dyshuar dhe një gjykatë në Shën Petersburg pritet të vendosë sot për masat paraprake.
Roman Novak, i njohur në qarqet e kriptos si “miku i Durovit”, kishte qenë më parë i dënuar në Rusi me gjashtë vjet burg për mashtrim në shkallë të gjerë. Pas lirimit me kusht, ai u zhvendos në Emiratet e Bashkuara Arabe dhe nisi projektin “Fintopio”, një platformë kriptomonedhash që grumbulloi mbi 500 milionë dollarë investime përpara se ai të zhdukej.
Një teori e tretë, e përhapur nga disa investitorë të zhgënjyer, ngre dyshime se vrasja mund të jetë inskenuar, për ta ndihmuar Novakun t’i shpëtonte borxheve të tij. Ata pretendojnë se ai kishte “një histori zhdukjesh me paratë e të tjerëve”, gjithmonë duke përdorur emrin e themeluesit të Telegramit, Pavel Durov, për të fituar besimin e investitorëve.
Historia e Roman Novak mbetet një kujtesë e errët për botën e kriptos – ku pas premtimeve për pasuri të shpejtë shpesh fshihen mashtrime, rrezik dhe fund tragjik.
