Ligji për mbylljet e Call Center në Shqipëri ka nisur të diskutohet prej disa muajsh dhe kriza e të punësuarve në këto kompani ka filluar të jetë e dukshme. Numri i të rinjve që janë bërë pjesë e këtyre kompanive operatore është shumë i madh, por ata që janë të rrezikuarit e parë për të humbur vendin e punës janë të pasiguruarit. Janë mbi 10 mijë të rinj të pasiguruar, të cilët do të penalizohen me ligjin italian për Call Center. Ekspertët e çështjeve sociale dhe punësimit, në një prononcim për IN News, kanë deklaruar se ky grup të punësuarish do të jetë kontigjenti i parë që do të mendojë të braktisë dhe vendin.
Sipas ekspertit Kastriot Sulka, kanë nisur të ndihen efektet e para të zbatimit të ligjit, pasi shumë kompani në Shqipëri po mbyllen. Sulka theksoi se qeveria nuk ka bërë asgjë për frenimin e këtij fenomeni në një kohë që mund të kishte përgatitur politika lehtësuese për ta.
