Mbytet në Kepin e Rodonit babai i aktorit Elvis Pupa

Një burrë 65 vjeçar ka humbur jetën pasditen e sotme në Kepin e Rodonit pasi u mbyt në det teksa lahej. Ai doli i gjallë nga uji, por vdiq rrugës për në spital ku u dërgua me ambulancë. Viktima është Hysen Pupa, 65 vjeç, banues në Shijak, raporton noa.al duke cituar burime në vendngjarje të konfirmuara edhe nga policia lokale. I ndjeri kishte shkuar për t’u larë në det dhe në një moment, pasi është futur në ujë, befas ka pasur bllokim dhe nuk mbushej më me frymë si pasojë e dallgëve që ishin të shumta në vendin e quajtur Shën Pjetër pranë Kepit të Rodonit. Në det janë afruar disa njerëz në përpjekje për ta shpëtuar, informon noa.al, duke iu referuar dëshmive që mblodhi policia në vendngjarje. Ndërkohë u kërkua ndihmë dhe atje në pak minuta mbërriti një autoambulancë e cila e transportoi për në spitalin e Durrësit, por 65 vjeçari ndërroi jetë rrugës. I ndjeri Hysen Pupa, ishte babai i aktorit të talentuar dhe të mirënjohur të humorit, Elvis Pupa, i njohur sidomos për rolet e tij në “Portokalli” si dhe disa spektakle të tjera humori. Stafi i “WHO” i shpreh ngushëllime familjes për humbjen e njeriut të tyre të dashur.