Prezantuesja e njohur italiane Mara Venier ka rrëfyer për herë të parë periudhën e vështirë të jetës së saj, kur ish-partneri e keqtrajtonte. Në një intervistë për “Corriere della Sera” Venier ka treguar se dikur ishte në një lidhje me një partner të dhunshëm që e bëri të ndihej një hiç.
“Kisha një ish-partner të dhunshëm. Shumë i dhunshëm. Më rrahu. Ai shkoi deri aty sa u përpoq të më vriste. Më priti me thikë poshtë shtëpisë. Pagova një çmim shumë të lartë. Ai njeri nuk është më dhe në fund e fala. Ishte një njeri që nuk e pranoi fundin e historisë sonë. Thonte se më donte akoma. Por kjo nuk është dashuri. Ata janë burra që e ndjejnë se i zotërojnë trupin dhe shpirtin tënd dhe ata të shkatërrojnë. Dhuna e meshkujve nuk shprehet vetëm me goditje dhe thikë, por përmes një procesi denigrimi dhe nënshtrimi. Të bëjnë të ndihesh një hiç. Një lodër në duart e tyre. Kam ndjerë frikë. Frika nga dhuna fizike dhe frika për të bërë denoncim, por unë isha e dashuruar dhe kur dashuron nuk do të shohësh. Dashuria të shtyn të justifikosh thuajse gjithçka. Ishte një gabim i rëndë. Në fund u detyrova ta denoncoj”, tregoi ajo.
Venier vazhdoi të shprehej se gratë heshtin pasi kanë dëshirën për ta shpëtuar partnerin teksa dha edhe një mesazh për vajzat: Të largohen kur shohin të tilla gjeste nga partneri i tyre.
“Mendoja se unë do ta shpëtoja atë, me mua ai do të jetë ndryshe, do ta ndryshoj. Por për fat të keq ata nuk ndryshojnë dhe pastaj duhet të largohemi. Lëreni atë. Në shuplakën e parë, menjëherë. Nuk duhet ta lejojmë të ushtrojë një pushtet, një dhunë mbi ne; përndryshe ka mbaruar”, tha prezantuesja.
