Pas disa ditësh diskutimesh në rrjete sociale, moderatorja Kiara Tito ka reaguar publikisht për deklaratën e Dojna Memës, e cila kohët e fundit kishte shprehur habinë që Kiara e kishte hequr nga “followers” në Instagram “pa asnjë arsye”.
Në një intervistë për emisionin “Mirëmbrëma Yje”, Dojna kishte thënë shkurt:
“Kiara më ka hequr nga ‘followers’ dhe nuk e di pse, kot.”
Kjo fjali e shkurtër mjaftoi për të ndezur diskutime mbi një ftohje të mundshme mes dy moderatoreve, që dikur kishin raporte të mira.
Mbrëmjen e së martës, në emisionin “Goca dhe Gra”, Kiara vendosi të sqarojë situatën dhe të mbyllë zërat që kanë qarkulluar.
“Nuk e kam hequr unë, më ka hequr Dojna vetë. Të diskutosh këtë është si bisedë adoleshentesh. Kemi qenë kolege, kemi pirë kafe, kemi ngrënë bashkë. Nëse kishte ndonjë merak, mund të flitej jashtë kamerave,” tha ajo.
Moderatorja shtoi gjithashtu se shpesh është vënë në shënjestër të mediave, por nuk ka dashur të ndërtojë vëmendje mbi konfliktet me të tjerët:
“Hajde të themi emrin e Kiarës dhe hajde të klikohemi. Unë nuk bëj karrierë me emrat e të tjerëve. Shumë herë jam sulmuar pa të drejtë, por nuk jam viktimizuar.”
Me këtë reagim, Kiara duket se ka dashur t’i japë fund një historie që, sipas saj, nuk ka asnjë arsye të kthehet në debat publik.
