Këngëtarja e njohur Anxhela Peristeri, e ftuar së fundmi në një intervistë në “Goca dhe Gra”, ka ndarë mendimet e saj për jetën personale, dashurinë dhe marrëdhëniet. Ajo ka treguar se dikur pyetjet për martesën e shqetësonin, por me kalimin e viteve i sheh me më shumë qetësi dhe mirëkuptim. Sipas saj, këto pyetje lindin më shumë nga dashuria dhe kurioziteti i njerëzve sesa nga qëllime të këqija.
“Dikur i përjetoja disi keq kur më pyesnin për martesën, por tani nuk më shqetësojnë fare. Shumë shqiptarë e bëjnë këtë pyetje nga dashuria, jo nga dashakeqësia. Ato që të prekin kur je 20 apo 25 vjeç, nuk të bëjnë më përshtypje kur je 40,” u shpreh Anxhela.
E pyetur për tradhtinë, ajo rrëfeu se e ka përjetuar jo vetëm në marrëdhënie dashurore, por edhe në miqësi. “Më kanë tradhtuar. Besoj se tradhtia lind kur nuk je i lumtur. Ka edhe tradhti shoqërore, shoqëria më ka tradhtuar shumë, por asnjëherë nuk më kanë bërë ndonjë gjëmë të madhe. Me të gjithë artistët flas, nuk i kam prishur marrëdhëniet. Edhe kur kuptoj ‘pucin’ që po më bëhet, nuk i jap shumë rëndësi,” tha këngëtarja.
Në fund, ajo shtoi me humor: “Akoma nuk e kam veshur fustanin e bardhë.”
