Këngëtari Ron Zaiti ka rrëfyer një moment të vështirë personal që ndodhi menjëherë pas përfundimit të aventurës së tij në reality show-n “Ferma VIP 2”. Gjatë kohës që ndodhej në format, Ron kishte folur publikisht me dashuri dhe besim për të dashurën e tij – por ajo çfarë e priste jashtë ishte krejt ndryshe.
I ftuar në emisionin “Natën me Aulonën”, ai tregoi se ka mësuar lajmin për ndarjen menjëherë sapo ka lënë fermën. “Dola dhe e mora këtë lajm, pak shokuese për mua, por që ndodhin…” – tha ai, duke lënë të kuptohet se nuk e kishte pritur një fund të tillë.
Sipas tij, pjesëmarrja në “Ferma VIP” nuk ka qenë shkaku i vetëm i ndarjes. “Nuk mendoj që ka qenë vetëm formati arsyeja… kanë qenë disa gjëra që kanë ndodhur më parë,” – sqaroi Ron, duke nënvizuar se lidhja e tyre kishte pasur probleme edhe më herët.
Një nga momentet më zhgënjyese për të ishte fakti se nuk e gjeti të dashurën e tij pas daljes nga formati, ndonëse kishte shpresuar në një takim me të. “Vazhdova jetën… mora mesazhe dhe e kuptova pse”, përfundoi ai.
Gjatë verës së kaluar, Ron Zaiti dhe këngëtarja Semi Jaupaj u përfolën shumë për marrëdhënien e tyre, pas një bashkëpunimi muzikor ku u panë shumë të afërt. Edhe pse ata nuk e konfirmuan kurrë një lidhje dashurie, publiku dhe ndjekësit vunë re se çifti nuk ndiqej më në Instagram, duke ngritur dyshimet për një përfundim të raportit mes tyre.
I pyetur në rrjete sociale nëse do të ketë ndonjë bashkëpunim të ri me Semin, Roni la të hapur mundësinë, duke e vlerësuar atë si një artiste cilësore:
“Mbase në të ardhmen. Gjithmonë dua të bëj këngë me artistë të mirë.”
Megjithatë, në një paraqitje të fundit në emisionin “Prive”, Zaiti ishte i qartë kur u pyet për natyrën e marrëdhënies së tij me Semin. “Kolege prej ditës zero, keni gabuar pak,” – u shpreh ai, duke mohuar çdo insinuatë për diçka më shumë.
