Në një nga episodet e fundit të podcastit “Allishverishi”, të drejtuar nga Gjergj Luca dhe Bledi Mane, opinionisti i Big Brother VIP Albania, Arbër Hajdari, ka folur hapur për përvojat e tij profesionale dhe raportet me moderatorët e spektaklit.
Gjatë bisedës, ai u ndal te bashkëpunimi me dy moderatorët e formatit, Ledion Liço dhe Arbana Osmani. Hajdari theksoi se, edhe pse i konsideron të dy shumë profesionistë, me Ledionin ndihet më i përshtatur në komunikim dhe në mënyrën e bashkëpunimit.
Sipas tij, mes tyre është krijuar një nivel i veçantë mirëkuptimi, deri në atë pikë sa shpesh komunikojnë vetëm me shikime gjatë transmetimit.
“Kam kaluar goxha kohë me të dy dhe mendoj se janë profesionistë shumë të mirë. Por me Ledionin e kam gjetur më shumë veten. Kemi arritur në një nivel komunikimi që ndonjëherë nuk flasim fare, por kuptohemi vetëm me sy,” u shpreh Hajdari.
Ai shtoi gjithashtu se një nga arsyet pse e vlerëson Ledionin është mënyra se si dëgjon dhe respekton mendimin e tjetrit, edhe kur nuk bie dakord me të.
“Ledioni është një njeri që të dëgjon mendimin dhe e respekton atë, edhe kur është kundër tij. Edhe kur të kundërshton, e bën me shumë edukatë.”
Në fund, Hajdari nënvizoi se komunikimi dhe respekti reciprok janë elementë kyç në çdo bashkëpunim profesional. Megjithatë, deklarata e tij ka nxitur reagime të shumta në rrjetet sociale, ku shumë komentues e kanë interpretuar si një thumb të tërthortë ndaj ish-moderatores së spektaklit.
