Dolce, që prej të hënës është pjesë e një shkëmbimi surprizë mes BBVK dhe Grande Fratello Italia, ka bërë më shumë zhurmë në pak orë sesa shumë banorë që janë aty prej muajsh. Qëndrimi i saj pritet të zgjasë rreth një jave por me ritmin që ka nisur, duket se edhe 24 orë i mjaftojnë për të kthyer shtëpinë përmbys.
Ndërkohë në Kosovë, Edi, me të cilin Dolce nisi një romancë në BBVK, po e pret çdo ditë dhe pyet për të vazhdimisht. Por duket se Dolce nuk ka ndërmend të frenojë ritmin për asnjë arsye.
Hapi i saj i parë provokativ sapo hyri në shtëpi ishte deklarata se është single, duke shtuar se “Edi nuk është tipi im” diçka që shkaktoi reagime të forta në rrjet.
Por sot, ajo hodhi lëvizjen që po përflitet kudo. Si pjesë e një sfide nga “Vëllai i Madh”, Dolce duhej të zgjidhte tre banorë për të darkuar dhe zgjedhjet e saj ishin… pikante.
Ajo ftoi dy nga meshkujt më simpatikë të këtij edicioni, Omar dhe Jonas, të dy të përfshirë në romanca brenda shtëpisë me dy banore të tjera, Anitën dhe Rashën. Pa harruar zgjedhjen e tretë, Donatellën, një konkurrente më në moshë që njihet për karakter të fortë.
Reagimet? Të menjëhershme. Dy vajzat që janë në histori me Omar dhe Jonas shfaqën xhelozi të hapur dhe hyrja e Dolces në shtëpi duket se nuk është pritur aspak mirë.
Çfarë po planifikon Dolce? A është kjo strategji, lojë apo thjesht mënyra e saj spontane për të shkaktuar dramë?
Një gjë dihet me siguri: Dolce nuk do të largohet nga “Grande Fratello” pa bërë bujë. Dhe buja sapo ka nisur.
