Ditën e djeshme Beyonce prezantoi një album të ri, që mban titullin “The Lion King: The Gift”, të cilin ajo e quajti një letër dashurie për Afrikën. Të gjitha këngët ishin mjaft të bukura, por fansave ju ka tërhequr vëmendjen “Brown skin girl”. Në këtë këngë Beyonce transmeton një mesazh të fuqishëm se njerëzit duhet ta duan ngjyrën e lëkurës së tyre, por më i veçantë është fakti se në të është përfshirë edhe vajza e këngëtares, Blue Ivy. Vogëlushja këndon në pjesën e parë të “Brown skin girl” dhe për më tepër ajo e ka shkruar vetë pjesën e tekstit të saj.
Kjo gjë ju ka pëlqyer pafund fansave të Beyonce dhe të gjithë ata shprehen se tashmë Blue Ivy ka “rrëzuar nga froni” edhe nënën e saj. “Blue Ivy po i heq kurorën Beyonce me ‘Brown skin girl’. Faleminderit që po na dhuron kaq zë të bukur Blue Ivy…oh dhe nëna jote ja doli mbanë shumë mirë”, shkruante dikush me shaka në ‘Twitter’. Tashmë Beyonce duket se është e vendosur për ta bërë pjesë të industrisë së muzikës edhe vajzën, sepse përpara pak ditësh Blue Ivy u shfaq edhe në videoklipin e nënës së saj “Spirit”.
Në fakt nuk do të ishte çudi nëse vogëlushja do të kishte një sukses të jashtëzakonshëm në muzikë, duke qenë se të prindërit e saj janë dy nga artistët më të famshëm dhe të kërkuar në mbarë botën. /revistawho.com
