Në një rrëfim emocional në podcast-in “Zë me Mirën”, këngëtarja e njohur Adelina Ismaili ndau një nga periudhat më të vështira të jetës së saj, kur fama dhe sukseset nuk mundën ta mbrojnë nga sulmet brutale për shkak të bindjeve të saj politike dhe mbështetjes për partinë e Ibrahim Rugovës.
Në kulmin e karrierës, Adelina u vu në shënjestër, por gjërat u rënduan kur zbuloi se bisedat e saj private po përgoheshin.
“Djali që punonte në postë më tregoi… Ai më tha se bisedat e mia dhe të mamit po përgjoheshin,” tregoi ajo. Një bisedë shumë personale mes saj dhe së ëmës, e cila trajtonte një temë krejtësisht intime, u publikua në një gazetë të njohur dhe u shtrembërua për të krijuar një titull vulgar.
Adelina kujton pasojat e asaj ngjarjeje: “Nuk shkova në shkollë, nuk mund t’i shikoja profesorët e mi. U mbylla në dhomë për tre muaj. Nuk ngrita perdet, dhe nëna më sillte ushqimin brenda. Ishte një periudhë shumë e rëndë, sepse ndjeva se ishin shkelur të gjitha kufijtë.”
Rrëfimi i saj tregon anën e errët të jetës publike, ku shpesh herë shkelja e privatësisë dhe sulmet personale kalojnë çdo kufi etik dhe njerëzor.
